Sot vendi ynë do të jetë nën ndikimin e masave ajrore relativisht të qëndrueshme dhe të nxehta.
Moti parashikohet kryesish...
AKTUALITET
Bojkoti i gjyqtarëve pas vrasjes së Kalasë, shtyhet seanca për Veliajn
PiranjatPërditësimi i fundit 10 Tetor 2025, 10:20
Për herë të dytë është shtyrë seanca paraprake ndaj ish-kryetarit të Bashkisë së Tiranës, Erion Veliaj, e cila ishte parashikuar të zhvillohej ditën e sotme. Shkak për shtyrjen është bërë mosparaqitja e avokatëve, për shkak të bojkotit që vijon nga avokatët penalistë, pas vrasjes së gjyqtarit Astrit Kalaja më herët gjatë këtij viti.
Gjykata ka caktuar datën 21 tetor, ora 09:00, për zhvillimin e seancës së radhës, në të cilën pritet të merret vendimi nëse dosja ndaj Veliajt, bashkëshortes së tij Ajola Xoxa, dhe disa personave të tjerë të përfshirë, do të kalojë për gjykim apo jo.
Ndërkohë, më 2 tetor, Gjykata e Lartë ka rrëzuar rekursin e Veliajt, i cili kërkonte zëvendësimin e masës “arrest në burg” me një më të lehtë. Ai u arrestua më 10 shkurt, pas hetimeve të SPAK, që e akuzojnë për krijimin e një skeme komplekse korrupsioni dhe pastrimi parash, në bashkëpunim me bashkëshorten dhe të afërm të tjerë.
Sipas hetimeve, ish-kryebashkiaku dyshohet se përmes një rrjeti kompanish dhe OJF-sh, ka përfituar në mënyrë të paligjshme rreth 1 milion euro nga fondet publike dhe ryshfete nga biznesmenë dhe kontraktorë të bashkisë. Shuma të mëdha parash, sipas SPAK, janë përdorur për blerje luksoze online, kryesisht nga Ajola Xoxa.
Gjykata e Posaçme e Apelit ka justifikuar mbajtjen në burg të Veliajt dhe bashkëshortes së tij, duke theksuar se të dy kanë tentuar të ndikojnë në hetime, përmes manipulimit të provave dhe presioneve ndaj dëshmitarëve, përfshirë edhe kërcënime ndaj agjentëve të Byrosë Kombëtare të Hetimit (BKH).
Hetimi ndaj Veliajt është një ndër çështjet më të bujshme në vend që prej fillimit të vitit, duke vendosur në qendër të vëmendjes një nga figurat më të njohura të politikës shqiptare në dekadën e fundit.
Seanca e 21 tetorit pritet të jetë vendimtare për ecurinë e mëtejshme të çështjes. Nëse gjykata vendos që dosja kalon për gjykim, atëherë do të nisë zyrtarisht procesi penal ndaj Veliajt dhe të bashkëpandehurve të tjerë, ndërsa mbrojtja pritet të kërkojë sërish zbutje të masës së sigurisë dhe rrëzimin e akuzave.
