Ekziston mundësia e një takimi me Presidentin e Shteteve të Bashkuara të Amerikës, Donald Trump, në Kinë, tha sot President...
AKTUALITET
‘E cilësoi mercenar’/ Familja e Tahir Sinanit paralajmëron Ballën: Do mbajë përgjegjësi për sulmin ndaj dëshmorit të kombit
PiranjatPërditësimi i fundit 24 Qershor 2026, 17:35
Njazi Sinani, vëllai i dëshmorit të kombit Tahir Sinani, reagoi ashpër në një intervistë për Syri TV me gazetarin Elkier Bushkolaj, në lidhje me deklaratat e deputetit Taulant Balla, të cilat i cilësoi si një fyerje të rëndë ndaj figurës së një prej komandantëve më të njohur të luftërave çlirimtare shqiptare.
Ai theksoi se Tahir Sinani është i njohur dhe i vlerësuar zyrtarisht si dëshmor nga institucionet e Shqipërisë dhe Kosovës, ndërsa akuzoi Ballën se po mohon kontributin e një komandanti që, sipas tij, udhëhoqi luftën në disa fronte për çlirimin e trojeve shqiptare.
Intervista:
Bushkolaj: Përshëndetje, jemi live në Syri Televizion. Në vijim të sulmeve të qeverisë kundër protestës, pas ju publikua një letër që pretendonte se i përkiste komandant Plakut, e emrin e të cilit nuk e dinin as deputetët e Partisë Socialiste por që në fakt bëhet fjalë për Xheladin Gashin, një nga figurat emblemë të Ushtrisë Çlirimtare të Kosovës, ndaj protestës ka ardhur një tjetër sulm. Taulant Balla ka publikuar një dokument, që pretendon sipas tij, se në atë dokument ka shënime për para që janë marrë nga ushtarakë shqiptarë që kanë qenë pjesë e luftës së Ushtrisë Çlirimtare të Kosovës. Qëllimi i publikimit të këtij dokumenti ka qenë për të sulmuar një nga aktivistët që merr pjesë në protestë Dritan Goxhajn, por për hir të së vërtetës, ajo çfarë ne konstatuam është se në krye të këtij dokumenti është emri i Tahir Sinanit. Tahir Sinani, për ata që nuk e dinë, është një ushtarak nga Tropoja, i cili iu bashkua ndër të parët Ushtrisë Çlirimtare të Kosovës.
Ai mori pjesë në luftën e Kosovës, mori pjesë në luftën në Luginën e Preshevës, mori pjesë dhe në luftën e Maqedonisë së Veriut, ku dhe humbi jetën pas një shpërthimi me bombë tragjik në vitin 2001.
Është një nga figurat emblemë të Ushtrisë Çlirimtare të Kosovës, duhet të kemi parasysh që është në krye të listës së dëshmorëve nga Shqipëria. Malësia e Gjakovës, Hasi, por dhe zonat përreth si Kukësi dhe Mirdita kanë një numër shumë të madh dëshmorësh, ku patjetër emri i Tahir Sinanit qëndron në krye bashkë me Indrit Carën edhe shumë figura të tjera. Por ne sot, kemi vendosur që të kontaktojmë pikërisht familjen e Tahir Sinanit dhe unë kam në një lidhje direkte vëllain e tij, Njazi Sinani, vëllain e dëshmorit Tahir Sinani për ta pyetur nëse i ka parë këto lajme ku është publikuar një listë që e nxjerr dëshmorin e trojeve shqiptare Tahir Sinani, si një njeri që ka luftuar me pagesë për emër të UÇK-së, ndërkohë që të gjithë e dinë kontributin e tij, të gjithë e dinë se si ai e la familjen në ato vite të vështira dhe vendosi që të ishte ndër të parët që i bashkohet në front të UÇK-së. Përshëndetje Njazi.
Njazi Sinani: Faleminderit.
Bushkolaj: Së pari në emër të Syri Televizion të falënderoj që pranove për të zhvilluar këtë intervistë dhe do të doja të dija nëse i ke parë këto publikime ku paraqitet një listë, për vërtetësinë e të cilës nuk flas dot por aludohet që Tahir Sinani është paguar për të kontribuar për Ushtrinë Çlirimtare të Kosovës kur ndërkohë ne e dimë shumë mirë se cila ka qenë jeta dhe vepra e tij në shërbim të atdheut.
Njazi Sinani: Mirë faleminderit televizionit tuaj. Për respektin tuaj. Në radhë të parë në emër të familjes së dëshmorit të kombit vëllait tonë Tahir Sinanit, dënojmë familjarisht dhe publikisht në organet e këtij shteti të drejtësisë, ne sa dëgjuam këtë lajm të hidhur nga një deputet i kuvendit popullor në fakt, që nuk i lejohet një gjë e tillë, në asnjë mënyrë, për dëshmorin e kombit i cili është i faktuar publikisht nga dy shtete, nga Shqipëria dhe Kosova, që ai ka marrë pjesë në luftë dhe ka qenë drejtues i luftës, komandant i tre luftërave në çlirimet e trojeve të Kosovës dhe ai të akuzohet nga Taulant Balla me paturpësinë më të madhe njerëzore, që nuk duhet t'i lejohet asnjë deputeti, pa asnjë qytetari të thjeshtë dhe askujt që të mohojë luftën e një ushtaraku, një drejtuesi të luftës i cili ka marrë pjesë në tre luftëra për çlirimin e trojeve të Kosovës.
Bushkolaj: Njazi, të lutem do të pyes, a keni një apel për ish-drejtuesit e UÇK-së për komandantët që të dalin dhe të japin një sqarim për këto deklarata të Taulant Ballës, se këtu kemi një hipokrizi se në fund të ditës ne kemi një parlament që ka rrëzuar rezolutat për gjenocidin serb në Kosovë, madje dhe për gjenocidin serb në Bosnje. Tahir Sinani mercenar për herë të fundit është quajtur po themi në kohën e Millosheviçit dhe tani de fakto po aludohet sikur është mercenar në 2026-ën nga eksponentë shumë të lartë të parlamentit të Shqipërisë. A keni një apel për ato ish komandantë të UÇK-së me të cilët ka bashkëpunuar ngushtë Tahir Sinani, këtu kam parasysh zotin Çeku, komandant Sulltani dhe të paktën drejtuesit kryesorë të UÇK-së, a duhet të bëjnë ata një reagim për këto deklarata?
Njazi Sinani: Patjetër duhet bëjë një ndërhyrje Fatmir Limaj. Selim ka qenë komandanti që ka zëvendësuar Tahirin kur ai u caktua, mbasi mbaroi lufta në zonën e Pashtrikut në Prizren, ai u caktua nga ministria e mbrojtjes në Prishtinë, dhe ata e zëvendësoi komandant Selimi, edhe ai mund të prononcohet. Një komandant, me pseudonimin, nuk po më kujtohet mirë emri, po ka shumë komandantë, ka shumë shokë të Tahirit të luftës që mund të prononcohen për këtë rast.
Bushkolaj: Një pyetje thjesht, a ndjeni një keqardhje që busti i Tahir Sinanit nuk është në kryeqytetin shqiptar? Ne e kemi atë në Prizren, e kemi në Malësi të Gjakovës, po nuk e kemi në Tiranë dhe a ka pasur një vëmendje shteti shqiptar karshi familjes së Tahir Sinanit, dhe a ka pasur dhe një vëmendje nga Prishtina zyrtare karshi familjes së Tahir Sinanit, por dhe dëshmorëve të tjerë të Malësisë së Gjakovës?
Njazi Sinani: Shteti shqiptar, më fal po nuk u bëni asnjë gjë. Përkundrazi, në fillim as Kosova, doli komandanti i UÇK-së i cili bëni të mundur bustin e tij në Maqedoni, i cili bëni shpenzimet e, organizoi bustin e Tahir Sinanit në Tropojë.
Bushkolaj: E fundit zoti Njazi, duke ju falënderuar edhe për kohën, a keni një mesazh të fundit për Taulant Ballën dhe parlamentarë të tjerë shqiptarë që kanë publikuar këtë listë?
Njazi Sinani: Ne mesazhin e fundit e kemi si familje, duke qenë shumë, shumë të prekur shpirtërisht. Duke qenë një rast i papritur në familjen tonë. Personalisht nga Taulant Balla dhe nga ndonjë pushtetar tjetër. Dhe apeli ynë është që do t'i drejtohemi opinionit publik dhe organeve të drejtësisë, deri në zgjidhjen e kërkesës tonë.
Bushkolaj: Edhe diçka shumë shkurtër. Tahir Sinani në ato vite të vështira kur shkoi në luftë, fëmijët i ka pasur të mitur. Si ka qenë gjendja e tyre gjatë atyre viteve të vështira, për Shqipërinë, për trojet shqiptare, veçanërisht edhe për Tropojën, si ka qenë gjendja e familjes së tij në ato vite të vështira?
Njazi Sinani: Gjendja ishte shumë e rëndë domethënë, të rritësh, ai ka lënë familjen, ka lënë gruan me tre fëmijë, në Tiranë. Ishte me probleme jetësore, por ai duke pas parasysh gjënë më të madhe për kombin, ai iu fut lapidar, ia bashkëngjiti luftës, UÇK-së.
Bushkolaj: Njazi, të falenderoj shumë për këtë ndërhyrje në Syri Televizion, për të hedhur dritë mbi disa prej figurave që për hir të së vërtetës, në ato vite të vështira kontributin vendosën që ta jepnin në front, ndryshe nga shumë të tjerë që zgjodhën të largoheshin apo të mos i kushtonin qoftë edhe një artikull, dhe pse ishin njerëz me peshë në media. Të falënderoj për kohën, të falënderoj dhe për këtë ndërhyrje, të falënderoj dhe për këtë apel.
Njazi Sinani: Shumë faleminderit juve, qofshi të nderuar dhe do jem mirënjohës përgjatë gjithë jetës ndaj jush. Ndaj televizionit tuaj. Faleminderit.
