EMRAT/ Ndihmuan kreun shqiptar e kartelit të drogës, Ekuadori arreston 2 zyrtarët e Drejtësisë, në kërkim gjyqtari

Dritan Gjika

EKUADOR- Dy zyrtarë të drejtësisë në Ekuadro janë arrestuar pasi dyshohen si të implikuar në organizatën kriminale të Dritan Gjikës, shqiptarit të arrestuar më 6 shkurt 2024, në kuadër të një operacioni ndërkombëtar të koduar “La Pampa”, ose “Gram Fenix”. Mësohet se të arrestuarit janë identifikuar si Douglas C., dhe Luis S. Sipas mediave, ata u arrestuan natën e 17 gushtit 2024, gjatë një operacioni të përbashkët mes Policisë Kombëtare dhe Prokurorisë së Përgjithshme të Shtetit, në Ekuador.

Hetimet fillestare kanë nisur nga Europa e veçanërisht Spanja, teksa verifikimet zbuluan se përveç gjyqtarit të dosjes që gjithashtu është shpallur në kërkim, të implikuar në favorizimin e kartelit janë edhe dy të ndaluarit më sipër.

“Ata janë zyrtarë të drejtësisë dhe dyshohet se kanë marrë pjesë në dhënien e urdhrave në favor të anëtarëve të mafies shqiptare (nuk publikohen pozicionet konkrete të tyre). Ndërhyrja u krye në kantonin e Valencias, Los Ríos, ku banojnë të dy të përfshirët ... ata kanë dhënë në mënyrë të parregullt, masa sigurie në favor të tre të pandehurve që dyshohet se janë pjesë e mafies shqiptare...këta shtetas, të cilët ndodheshin në paraburgim për krim të organizuar dhe pastrim parash, dyshohet se ishin pjesë e një rrjeti kriminal të drejtuar nga Dritan G. (Dritan Gjika)”, njoftojnë autoritet.

Dritan Gjika akuzohet për drejtimin e  një rrjeti kriminal që trafikonte drogë midis Ekuadorit dhe Evropës. Ai u arrestua pas një megaoperacioni të zhvilluar në Ekuador dhe Spanjë kryesisht, si dhe në 57 vende të tjera, për të goditur një grup kriminal shqiptar të trafikut ndërkombëtar të kokainës dhe pastrimin e parave. Gjika, i cili u vendos në Ekuador në 2009-n, ishte në mesin e 18 anëtarëve të kartelit që u arrestuan në vendin e Amerikës së Jugut dhe cilësohet si kreu i saj.

dritan gjika