Gjykata Penale ka vendosur lirimin e tre protestuesve të ndaluar gjatë protestave studentore, të cilat vijojnë prej dy javësh në...
AKTUALITET
Fshehu kokainën në lavatriçe dhe deodorantë, arrestohet 22-vjeçari shqiptar
PiranjatPërditësimi i fundit 11 Qershor 2026, 11:51
Një 22-vjeçar shqiptar është arrestuar nga Policia e Shtetit në Novara të Italisë, pasi u kap me rreth 1 kilogram kokainë dhe 229 doza të gatshme për shitje, të fshehura në mënyrë të sofistikuar brenda banesës së tij.
Sipas autoriteteve italiane, operacioni u zhvillua pasditen e 28 majit në kuadër të kontrolleve kundër trafikut dhe shpërndarjes së lëndëve narkotike në zonën e stacionit hekurudhor të Novarës. Agjentët e Skuadrës Mobile vunë re një të ri shqiptar, pa precedentë penalë, i cili lëvizte me një skuter elektrik pranë stacionit dhe shfaqte sjellje të dyshimta.
Gjatë kontrollit, policët gjetën tek ai një shumë të konsiderueshme parash në kartëmonedha me prerje të ndryshme, të cilat nuk justifikoheshin nga ndonjë aktivitet i ligjshëm pune. Kjo i shtyu hetuesit të kryenin një kontroll më të thelluar, duke ushtruar më pas kontroll edhe në banesën e tij, e cila ndodhej fare pranë stacionit hekurudhor.
Gjatë bastisjes në apartament, policia zbuloi rreth 1 kilogram kokainë të fshehur me kujdes. Një pjesë e drogës ishte vendosur brenda lavatriçes, mes kazanit dhe motorit, ndërsa 229 doza të paketuara dhe gati për shitje ishin fshehur brenda dy deodorantëve tip “stick”.
Përveç lëndës narkotike, në banesë u sekuestruan edhe materiale që përdoreshin për ndarjen dhe paketimin e dozave të kokainës.
Sipas hetimeve, i riu kishte zgjedhur qëllimisht një banesë pranë stacionit të trenit, për shkak të pozicionit strategjik që i mundësonte të lëvizte shpejt për takimet me blerësit dhe të shpërndante drogën me rrezik minimal për t’u zbuluar nga policia.
Pas analizave teknike dhe shkencore të kryera nga Policia Shkencore e Novarës, 22-vjeçari shqiptar u arrestua nën akuzën e posedimit të lëndëve narkotike me qëllim shpërndarjen e tyre.
Operacioni bën pjesë në aksionet e vazhdueshme të policisë italiane për goditjen e trafikut dhe shpërndarjes së drogës në zonën e stacionit hekurudhor të Novarës.
