Protestat në Tiranë vijojnë me përplasje mes demonstruesve dhe policisë së rendit, shkruan BBC. Nxënësit e shkollave t...
AKTUALITET
Hakeroi email-et e prokurorëve të SPAK, ish-zyrtari: E bëra nga kurioziteti!
M.B.Përditësimi i fundit 10 Prill 2025, 18:09
TIRANA- I arrestuari për hakerimin e e-maile-ve të SPAK, Arnold Rrokaj, ka pranuar akuzën. Bëhet me dije se ai para hetuesve ka pranuar se ia kishte dalë mbanë të thyente e-mailet e tre prokurorëve, ndërsa ka kopjuar prej tyre komunikime hetimore për tre çështje. Mësohet se Rrokaj është shprehur se e ka bërë nga kurioziteti.
“E bëra nga kurioziteti,” ka thënë ai.
Sipas informacioneve, i dyshuari, me detyrë të mëparshme punonjës pranë IMT, ia ka kaluar më tej të dhënat Zambak Gjonit, edhe ai me profesion jurist, si dhe ish-zyrtar i burgjeve. Prokuroria e Posaçme ka reaguar më 3 prill për lajmin se ndaj këtij institucioni dhe ndaj vetë adresave të email-eve të prokurorëve ka patur një sulm kibernetik.
SPAK pohon me anë të një njoftimi se morën informacion në datën 12 mars 2025 se ishte vënë në shënjestër të një ndërhyrje të paligjshme të adresave të email-eve të prokurorëve të posaçëm. Institucioni bën me dije se falë masave të sigurisë, nuk u arrit të ndërhyhej në sistemin e brendshëm të Strukturës së Posaçme kundër Korrupsionit dhe Krimit të Organizuar, i cili mbetet i pacënuar.
SPAK shton se nga verifikimet, ka rezultuar se është ndërhyrë vetëm në adresat e e-maile-ve të disa prokurorëve, por jo në sistemin e përgjithshëm të IT-së të institucionit. Sipas njoftimit, personat përgjegjës kanë arritur të marrin disa informacione, pa mundur të sigurojnë akses në dosje hetimore. Po ashtu, ata kanë tentuar të ndërhyjnë edhe në email-in e Drejtuesit të Prokurorisë së Posaçme, Altin Dumani, por, sipas SPAK, pa sukses.
Në njoftim bëhet me dije se janë identifikuar dhe arrestuar brenda 24 orëve dy persona, individin që ka realizuar ndërhyrjen në e-mail-e dhe atë që ka shpërndarë informacionin tek persona të tretë. Gjithashtu, shton SPAK, u bë e mundur sekuestrimi i paisjeve të përdorura për të realizuar ndërhyrjen si edhe skedarët (file) e shkarkuar. Prokuria e Posaçme thotë se deri në këtë fazë të hetimit nuk ka asnjë të dhënë që personat e arrestuar të kenë bashkëpunuar me personel të brendshëm të SPAK.
