I dëbuar 2 herë nga Anglia, "skifteri" shqiptar "sfidon" autoritetet britanike, rikthehet në Londër dhe filmon veten duke bërë xhiro me Ferrari

Dorian Puka

LONDËR- Një shqiptar i dënuar ka marrë vëmendjen e mediave ndërkombëtare për shkak të veprimeve të tij të fundit. 28-vjeçari nga Lezha, Dorian Puka, i dënuar nga Shqipëria, filmoi veten me një Ferrari në Londër, pavarësisht se u deportua dy herë nga Britania e Madhe, shkruan “The Telegraph”.

I burgosur dhe deportuar dy herë për vjedhje, shqiptari u kthye fshehurazi në Mbretërinë e Bashkuar dhe postoi një video 90 sekonda të gjatë duke drejtuar makinën 300,000 £ në llogaritë e tij TikTok dhe Instagram. Zyra e Brendshme pranoi se nuk mund të largonte dot Pukën, derisa kërkesa e tij për azil të ishte dëgjuar plotësisht, por paralajmëroi se kriminelët e huaj nuk duhet të kenë “asnjë dyshim” për zbatimin e ligjit. The Telegraph zbuloi se një tjetër kriminel shqiptar, i cili hyri sërish në Britaninë e Madhe pasi u deportua, fitoi të drejtën për të qëndruar në bazë të Konventës Evropiane për të Drejtat e Njeriut.

Puka fillimisht u burgos për nëntë muaj në 2016 dhe u deportua një vit më pas për tentative për të grabitur një pronë. Pronari e pa atë në një kamera në internet ndërsa ishte me pushime në Francë. Brenda një viti, ai arriti të shmangte kontrollet kufitare dhe të kthehej në MB dhe të kryente një varg vjedhjesh në periferi të Londrës. Puka u kap përfundimisht nga oficerët me rroba civile që patrullonin në Surbiton, në jugperëndim të kryeqytetit. Ai kishte një orë të shtrenjtë që e kishte vjedhur. 28-vjeçari u burgos për tre vjet e gjysmë dhe më pas u deportua në mars 2020.

Gjatë kohës së tij në një burg në Mbretërinë e Bashkuar, ai fitoi famë për përdorimin e një telefoni celular të paligjshëm të kontrabanduar në burg për të postuar fotot e tij në Instagram. Ai pozoi përkrah udhëheqësit të një grupi të krimit të organizuar, i cili po vuante një dënim 12-vjeçar për konspiracion për furnizim kokaine dhe pastrim parash.

Pasi u kthye në Shqipëri për disa muaj, ai udhëtoi nëpër Gjermani, Belgjikë dhe Holandë përpara se të mposhte kontrollet kufitare për të hyrë sërish në Britani në dhjetor 2020, sipas llogarisë së tij në Instagram.

Përveç klipit të Ferrarit, ai ka postuar foto dhe video të kohës së tij në pushime në hotelin Carbis Bay pranë St Ives, Cornwall, ku shfaqet duke ecur në plazh. Llogaria e tij në rrjetet sociale përfshin gjithashtu foto me makina të tjera luksoze, duke përfshirë një Porsche Cayenne, një Mercedes G-Wagon, një Bentley Bentayga, një BMË X5, një Mercedes AMG dhe një Jaguar XF. Burimet e tij të financimit mbeten të panjohura, por raportet shqiptare sugjerojnë se ai ka qëndruar në një apartament me dy krevate prej 250,000 £ në Hounslow, në perëndim të Londrës.

dorian puka londer