Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
AKTUALITET
"Kam qenë i sëmurë"/ Zbardhet dëshmia e rojës së sigurisë: Vuaj nga diabeti, isha me leje
PiranjatPërditësimi i fundit 9 Tetor 2025, 09:47
Gjykata ka vendosur masën e sigurisë "arrest në burg" për tre personat e arrestuar në lidhje me vrasjen e gjyqtarit Astrit Kalaja në sallën e gjyqit. Personat që do të qëndrojnë në qeli deri në përfundimin e hetimeve janë, Elvis Shkambi, xhaxhai i tij Gjon Shkambi dhe roja i sigurisë Banush Koxhaj.
Në dëshminë e tij, Koxhaj ka pretenduar se ka kërkuar leje nga kancelarja e gjykatës për t'u larguar, pasi nuk ndihej mirë për shkak të sëmundjes së tij (diabeti). Ai ka theksuar se i ka lajmëruar kancelaren para se palët të kalonin në skaner, dhe një orë më pas ajo i ka dhënë leje për të lënë vendin e punës, por nuk është bërë zëvendësimi i tij. Dëshmia e tij është dhënë para togave të zeza.
“Kam qenë i sëmurë, para se të kalonin palët në skaner, unë kam lajmëruar dhe kancelaren se nuk ndihem mirë, pasi vuaj nga diabeti. Një orë me pas kancelarja më ka dhënë leje për tu larguar por nuk jam zëvendësuar”
Ngjarja tragjike ndodhi më 6 tetor, kur Elvis Shkambi qëlloi për vdekje gjyqtarin Astrit Kalaja dhe plagosi rëndë babë e bir, Ragip dhe Ervis Kurtaj, palë në procesin gjyqësor. Vrasja ndodhi në sallën e gjyqit dhe tronditi opinionin publik për brutalitetin dhe mënyrën se si u realizua.
Elvis Shkambi akuzohet për vrasje të funksionarëve publikë, vrasje në rrethana cilësuese kundër palëve të përfshira në proces, kryerje në bashkëpunim, si dhe mbajtje pa leje të armëve dhe municioneve luftarake.
Për xhaxhain e tij, Gjon Shkambi, prokuroria ka ngritur dyshime se ai kishte dijeni për planin e nipit të tij dhe mund të ketë pasur një rol nxitës në sulmin ndaj palës kundërshtare. Dyshimet janë përforcuar nga fakti se Gjon Shkambi është në konflikt me familjen Kurtaj për një pronë në Shkodër, çështje që mund të ketë pasur ndikim në ngjarjen e rëndë.
Seanca ndaj të arrestuarve u zhvillua nën masa të rrepta sigurie dhe me dyer të mbyllura.
