Deri në muajin qershor 2026 stoku i numrit të shtetasve të huaj të punësuar në vend arriti në 22,6 mijë individë ...
AKTUALITET
Kapet banda që ndihmonte emigrantët të kalonin ilegalisht kufirin në Kapshticë, arrestohen 3 sudanezë
PiranjatPërditësimi i fundit 4 Shkurt 2026, 14:56
Tre shtetas sudanezë janë arrestuar në qarkun e Korçës, të dyshuar për dhënie ndihme emigrantëve për kalimin e paligjshëm të kufirit drejt vendeve të Bashkimit Europian. Sipas të dhënave zyrtare, ata dyshohet se kanë ndihmuar gjithsej 31 emigrantë për të kaluar ilegalisht kufirin e gjelbër në zonën e PKK Kapshticë.
Dy prej të arrestuarve u kapën në fshatin Qatrom, ku ishin fshehur në një banesë të braktisur së bashku me 16 emigrantë. Njëri prej tyre rezulton të ketë qenë më herët i dëbuar nga Shqipëria, pasi ishte ndaluar për të njëjtën veprimtari.
Në një rast tjetër, një shtetas sudanez u arrestua në zonën e Drenovës, nën dyshimin se kishte ndihmuar 15 emigrantë të tjerë për kalimin e paligjshëm të kufirit.
Hetimet për rastet janë në vijim, ndërsa materialet i janë referuar Prokurorisë së Korçës për veprime të mëtejshme ligjore.
Njoftimi i policisë:
DVKM Korçë/Finalizohen në 24 orë, 2 operacione kundër dhënies ndihmë emigrantëve, për të kaluar kufijtë, ilegalisht.
Si rezultat i operacioneve “Rikthimi” dhe ”Itinerari”, kapen 3 shtetas sudanezë, të cilët të organizuar si grup, ndihmuan 31 emigrantë për të kaluar ilegalisht, kufirin e gjelbër në PKK Kapshticë.
2 shtetasit e kapur gjatë operacionit “Rikthimi”, së bashku me 16 emigrantët që kishin ndihmuar, ishin fshehur në një banesë të braktisur në fshatin Qatrom. Banesa u zbulua si rezultat i ndjekjes disaditore, nga shërbimet e Policisë.
Njëri prej të arrestuarve gjatë këtij operacioni, ishte dëbuar më parë nga Republika e Shqipërisë, pasi ishte ndaluar duke kryer të njëjtën veprimtari kriminale.
Si rezultat i hetimeve dhe punës operacionale intensive, të kryera me qëllim parandalimin dhe goditjen e veprimtarisë kriminale të dhënies ndihmë, kundrejt parave, emigrantëve që synojnë të shkojnë në mënyrë të kundërligjshme, në shtete të BE-së, u finalizuan në 24 orë, operacionet “Rikthimi” dhe “Itinerari”.
Gjatë operacionit “Rikthimi”, u vunë në pranga shtetasit H. A., 27 vjeç dhe M. H., 20 vjeç (i dëbuar më parë, nga Republika e Shqipërisë, pasi u ndalua për të njëjtin krim), sepse si rezultat i ndjekjes disaditore, nga shërbimet e Policisë Kufitare të DVKM Korçë, u kapën në një banesë të braktisur, në fshatin Qatrom, ku ishin fshehur për të shmangur shërbimet e Policisë, së bashku me 16 emigrantët që kishin ndihmuar për të kaluar ilegalisht, kufirin e gjelbër në PKK Kapshticë.
Gjatë operacionit “Itinerari”, i cili u zhvillua nga Policia Kufitare e DVKM Korçë në bashkëpunim me shërbimet e DVP Korçë, u kap dhe u vu në pranga shtetasi M. H., 30 vjeç, pasi dyshohet se ka ndihmuar 15 emigrantë, për të kaluar ilegalisht, kufirin e gjelbër në PKK Kapshticë. Emigrantët u kapën në territorin e fshatit Drenovë.
Punohet për identifikimin dhe nxjerrjen përpara përgjegjësisë penale, të shtetasve të tjerë të përfshirë në këto raste.
Materialet procedurale iu referuan Prokurorisë së Korçës, për veprime të mëtejshme.
