Të ardhurat që shteti siguron nga dhënia me qira e pasurive të sekuestruara dhe të konfiskuara kanë shënuar një rritje t...
AKTUALITET
Kërkohej nga policia shqiptare, arrestohet në Itali shqiptari
PiranjatPërditësimi i fundit 21 Janar 2026, 10:50
Një shtetas shqiptar, i shpallur në kërkim ndërkombëtar nga autoritetet shqiptare, është arrestuar në qytetin Fasano, në Itali, pas një operacioni të zhvilluar nga Guardia di Finanza.
Arrestimi u krye në përfundim të një aktiviteti informativ-hetimor të realizuar nga efektivët e GICO-s, pranë Njësisë së Policisë Ekonomiko-Financiare të Leçes, në kuadër të një operacioni të synuar në territor.
Shtetasi shqiptar u ndalua dhe u arrestua përkohësisht me qëllim ekstradimin drejt Shqipërisë, në zbatim të një urdhër-arresti ndërkombëtar të lëshuar më 10 mars 2022 nga Gjykata Penale e Lushnjës. Ai ishte dënuar me 2 vite burg për veprën penale të mbajtjes pa leje të armëve dhe lëndëve plasëse, vepër e kryer në dhjetor të vitit 2015 në ambientet e një lokali në Shqipëri.
Gjatë kontrollit të banesës ku qëndronte, autoritetet italiane sekuestruan një pistoletë të kalibrit 7.65 me numër serie të fshirë, me karikator të mbushur me 4 fishekë, si dhe dokumente identifikimi të falsifikuara, të cilat dyshohet se janë përdorur për t’iu shmangur arrestimit gjatë periudhës së arratisjes.
Në vijim, i arrestuari u referua në Prokurorinë e Brindizit për mbajtje të paligjshme të armëve dhe municioneve në territorin italian dhe u dërgua në burgun e Brindizit.
Ndërkohë, autoritetet italiane kanë nisur hetime të mëtejshme për të verifikuar përfshirjen e mundshme të një shtetaseje shqiptare, e cila dyshohet se e ka strehuar të kërkuarin gjatë periudhës së arratisjes.
Operacioni është pjesë e angazhimit të Guardia di Finanza në ruajtjen e rendit dhe sigurisë publike, si dhe në luftën kundër kriminalitetit të organizuar në nivel ndërkombëtar.
