Protestat kundër qeverisë vijojnë edhe këtë të hënë në Tiranë, ndërsa aksioni qytetar shënon dit&e...
AKTUALITET
Konsumatorët bëhen pesimistë, bie besimi në ekonomi
PiranjatPërditësimi i fundit 4 Maj 2026, 10:57
Besimi në ekonomi i është kthyer rënies në muajin prill. Sipas vrojtimit më të fundit të Bankës së Shqipërisë, treguesi i ndjesisë ekonomike (TNE) ra me 1.5 pikë, duke reflektuar një frenim të lehtë të optimizmit në ekonomi, kryesisht nga dobësimi i besimit në shërbime, tregti dhe te konsumatorët. Megjithatë, niveli i tij mbetet 6.4 pikë mbi mesataren afatgjatë, çka tregon se klima ekonomike vijon të jetë relativisht e qëndrueshme.
Në krahun e bizneseve, tabloja është e përzier. Industria dhe ndërtimi kanë dhënë sinjale pozitive në prill, duke kompensuar pjesërisht rënien në sektorët e tjerë. Besimi në industri u rrit me 1.5 pikë përqindje, i nxitur nga pritje më optimiste për prodhimin dhe kontratat nga eksportet. Ndërkohë, ndërtimi shënoi rritjen më të fortë mujore, me +4.9 pikë përqindje, i mbështetur nga përmirësimi i porosive aktuale.
Nga ana tjetër, shërbimet dhe tregtia – dy sektorë kyç për ekonominë e brendshme – kanë dhënë sinjale dobësimi. Besimi në shërbime ra me 1.7 pikë, si pasojë e vlerësimeve më të dobëta për kërkesën dhe aktivitetin aktual. Edhe tregtia pësoi një rënie më të fortë, me 3.6 pikë përqindje, e lidhur kryesisht me performancën më të dobët të shitjeve. Pavarësisht kësaj, të dy sektorët mbeten dukshëm mbi mesataren historike, çka sugjeron se rënia është më shumë një korrigjim sesa një përmbysje trendi.
Sinjali më shqetësues vjen nga konsumatori. Treguesi i besimit konsumator ra me 3.2 pikë përqindje dhe qëndron rreth 4.5 pikë nën mesataren historike. Rënia është e shpërndarë në të gjithë komponentët: pritjet për financat personale, situatën ekonomike dhe sidomos për blerjet e mëdha. Të dhënat në tabelat e vrojtimit tregojnë se konsumatorët janë më pesimistë edhe për të ardhmen, ndërsa pritjet për çmimet dhe papunësinë kanë pësuar përkeqësim në prill. /ekofin.al
