Henna Virkkunen, nënkryetarja ekzekutive e Komisionit Evropian për sovranitetin e teknologjisë, sigurinë dhe demokracinë, paralajm&eu...
INVESTIGIME
Gratteri për Piranjat: Kam 38 vite që më duan të vdekur ndaj nuk dal kurrë në publik
PiranjatPërditësimi i fundit 31 Maj 2026, 14:01
Për më shumë se tre dekada, jeta e kryeprokurorit italian të antimafias, Nicola Gratteri, ka qenë nën hijen e kërcënimeve të vazhdueshme me vdekje. Në intervistën për Piranjat, ai rrëfen se sulmi i parë ndaj tij daton në vitin 1989, kur persona të armatosur qëlluan me armë zjarri drejt shtëpisë së të fejuarës së tij dhe më pas paralajmëruan familjen se ajo po martohej “me një të vdekur”.
Gratteri tregon se me kalimin e viteve kërcënimet u shtuan, deri në pikën që struktura të ndryshme të mafies italiane planifikuan eliminimin e tij. Për shkak të rrezikut të vazhdueshëm, ai prej dekadash bën një jetë të izoluar, pa mundur të shijojë aktivitetet më të zakonshme të përditshmërisë, si kinemaja, teatri apo një shëtitje e thjeshtë në qytet.
Gratteri: Episodi i parë ndodhi në vitin 1989 kur një mbrëmje, një natë qëlluan në derën e të fejuarës time. Kanë qëlluar 5 ose 6 herë me pistoletë. Më pas e kanë telefonuar te telefoni i shtëpisë dhe i kanë thënë: “je duke u martuar me një të vdekur”. Me kalimin e viteve ka patur një rritje të kërcënimeve, nga leximi i përgjimeve telefonike dhe ambientale ku flitej se donin të më eliminonin.
Ndërkohë, para 5 vitesh ka qenë le të themi viti më i vështirë sepse disa struktura të Ndranghetas në botë, si në New York, u mblodhën për të vendosur që të më vrisnin. Pastaj u mblodhën edhe në Calabri.
Por Ndrangheta e zonës së Regio Calabrias atje ku unë jetoja, ka kundërshtuar duke thënë se nuk duan probleme. Kjo situatë ka bërë që unë të mos hyj kurrë në një stadium, të mos shkoj kurrë në kinema. Që nga fillimi i viteve 90 nuk e bëj më këtë jetë, nuk shkoj asgjëkundi.
Unë rri këtu në zyrë, Ha këtu në zyrë. Në darkë kthehem në shtëpi dhe të nesërmen në mëngjes kthehem prapë këtu. Ja për shembull, këtu në Napoli është një qytet ku ka shumë teatro, shumë ngjarje kulturore. Por unë nuk shkoj asgjëkundi.
Nuk kam hyrë kurrë në asnjë teatër këtu në Napoli apo të shoh ndonjë film apo të dal në lungomaren e Napolit për të ngrënë një picë./piranjat news
