Kreu i degës së Partisë Demokratike në Krujë, Aulon Kalaja, ka denoncuar publikisht presione të dyshuara të policisë n...
AKTUALITET
KPP i jep fund “dramës” së IT, rrëzon ankimimet e fundit për internetin dhe fiskalizimin
PiranjatPërditësimi i fundit 27 Shkurt 2026, 08:22
Dy procedura prokurimi, njëra e nisur në prill 2025 dhe tjetra në gusht 2025, të lidhura me sistemin e fiskalizimit në Tatime dhe me shërbimin e internetit për institucionet publike, rrezikojnë të thyejnë rekordin e ankimimeve dhe zvarritjeve në Komisionin e Prokurimit Publik (KPP).
Më 24 dhe 25 shkurt, KPP vendosi të mos pranojë sërish ankimimet e dy operatorëve që kishin paraqitur pretendime për këto procedura, të cilat ishin rrëzuar edhe më herët nga i njëjti Komision.
Në të dy rastet, KPP thekson se nuk pranon kërkesat e operatorëve pretendues dhe se në fazat e mëparshme janë bërë rishikimet e nevojshme në dokumentet standarde të procedurave, në përputhje me legjislacionin për prokurimet publike.
Tenderi me objekt “Mirëmbajtje e Modulit të Menaxhimit të Kontrollit të Faturimit për Drejtorinë e Përgjithshme të Tatimeve”, me fond limit 770 milionë lekë (rreth 7.7 milionë euro), nuk po arrin të finalizohet për shkak të ankesave të vazhdueshme që e kanë shoqëruar hap pas hapi.
Për herë të fundit, në mes të shkurtit, KPP hoqi pezullimin, duke i lejuar autoritetit kontraktor të vijojë me hapat e radhës. Sipas Komisionit, autoriteti kontraktor, Agjencia Kombëtare e Shoqërisë së Informacionit, që zhvillon procedurën për llogari të Drejtorisë së Përgjithshme të Tatimeve, kishte reflektuar kërkesat e bëra më herët nga KPP.
Tenderi tjetër, që ka në objekt ofrimin e shërbimit të internetit dhe intranetit për institucionet e administratës publike, me fond limit 486 milionë lekë (rreth 4.8 milionë euro), ka ndjekur një trajektore të ngjashme përgjatë muajve: herë i ankimuar dhe i pezulluar, e herë duke vijuar me fazën pasuese që më pas është kundërshtuar sërish. Edhe pse KPP i dha dritën jeshile pak javë më parë, procedura është ankimuar sërish.
Tenderët që lidhen me sistemet e IT në vend janë ankimuar në mënyrë të përsëritur pranë Komisionit të Prokurimit Publik, duke rrezikuar sigurimin e shërbimeve për institucionet.
Një rast i tillë ishte sistemi Self Care i Tatimeve, që shkaktoi ndërprerje dhe paqartësi për disa javë rresht, në një periudhë kur qeveria u kërkoi institucioneve që, për shpenzimet e investimeve, të merrnin konfirmim nga Thesari. Kjo ndodhi në një kohë kur edhe sistemi AFMIS i Financave nuk funksiononte, ndërsa procedura për kontratën përkatëse ishte edhe ajo më herët e ankimuar po që me pas u dha ok. /Monitor
