Revista gjermane “Der Spiegel” i ka kushtuar vëmendje protestave në Shqipëri, duke i përfshirë ato në një panor...
BOTA
Protesta masive në Francë, afro 1 mijë të arrestuar pas përplasjeve me policinë
PiranjatPërditësimi i fundit 25 Tetor 2026, 13:54
Franca është përfshirë nga një tjetër valë protestash masive kundër shtrenjtimit të jetesës dhe kushteve të vështira në arsim, ndërsa përplasjet me policinë kanë çuar në afro 1 mijë arrestime.
Sipas Ministrisë së Brendshme, rreth 410 mijë qytetarë dolën në rrugë të shtunën, ndërsa sindikatat pretendojnë se numri i pjesëmarrësve arriti në 800 mijë.
Megjithëse marshimet nisën paqësisht, tensionet u përshkallëzuan në orët e mbrëmjes.
Në Paris, protestuesit ngritën barrikada dhe hodhën sende drejt policisë, e cila ndërhyri me gaz lotsjellës, ujë me presion dhe shkopinj gome.
Ministri i Brendshëm, Laurent Nuñez, deklaroi se mes pjesëmarrësve ndodheshin mijëra aktivistë radikalë, përfshirë rreth 500 persona të identifikuar si pjesëmarrës në trazira.
Skena të ngjashme u regjistruan në Marsejë, ku u dogjën kazanë mbeturinash dhe u ngritën barrikada në rrugë.
Në Bordo, protestues të maskuar përdorën materiale nga ndërtesat për të bllokuar qarkullimin, ndërsa në Lion policia ndërhyri me gaz lotsjellës për të shpërndarë turmën.
Për të parandaluar përsëritjen e dhunës së fundjavës së kaluar, autoritetet mobilizuan rreth 70 mijë efektivë policie dhe vendosën kufizime për tubimet në disa qytete.
Presidenti Emmanuel Macron kishte urdhëruar që të lejoheshin vetëm demonstratat e organizuara nga sindikatat e njohura zyrtarisht.
Sipas autoriteteve, afro 1 mijë persona u arrestuan gjatë protestave të së shtunës, ndërsa dy persona mbetën të plagosur rëndë në Tuluzë dhe Klermon-Ferran.
Ndërkohë, vala e protestave po shton presionin ndaj presidentit Macron, vetëm gjashtë muaj përpara zgjedhjeve presidenciale në Francë.
