Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
AKTUALITET
Kush po e fsheh skandalin?! Transaksionet mln euro në truallin e ARMO-s, Shijaku e Gjonaj Grup morën “bekimin” e qeverisë!
PiranjatPërditësimi i fundit 29 Mars 2025, 13:42
TIRANA- Kamberi dhe shumë të tjerë, ish-punonës të rafinerisë ARMO në Ballsh, prej shumë vitesh kanë fituar gjyqe për dëmshpërblim.
Ata nuk u paguan për vite me radhë duke u hedhur në rrugë. E gjithë rafineria, dikur shtetërore dhe e privatizuar në mënyrë abuzive, ka shkuar për skrap, teksa trualli është shitur disa herë.
Të gjithë dolën të fituar, që nga kompanitë private apo edhe administratorët, pasi askush s’është në burg megjithëse të gjithë s’paguan taksa, furnitorët, energi elektrike apo as punëtorët.
Por, çfarë po ndodh aktualisht?!
Faksimile: Kompania ARMO figuron ende aktive dhe shteti ka 15 % të aksioneve
Vetë shteti, që kishte 15 % të aksioneve të asaj rafinerie, ka “bekuar” që ai kombinat të shkrihet dhe të shitet.
Disa firma private u morën me hekurat, ku punëtorët thanë se vlera e tyre arrinte mbi 100 milionë euro.
Firma e parë që shkoi atje, pas rrënimit ishte Shijaku Grup. Në atë kohë u tha se firma që merret me skrap shkoi atje pasi kishte fituar një ankand nga një bankë e nivelit të dytë.
Transaksioni ishte rreth 20 milionë euro, ndërkohë që mjetet e rënda të kësaj firme morën të gjitha hekurishtet.
Sërish nuk u bë asnjë inventar se sa pasuri po shitej për skrap, kush ishte përfituesi dhe çfarë do të ndodhte më pas me Kombinatin!
Por, pasi u morën të gjitha hekurat, firma që fitoi ankandin, Shijaku Grup, hapi një tjetër kompani që në atë vend të ndërtohej një park fotovoltaik.
Por kush ia fali trualin firmën Shijaku?!
Ende nuk ka asnjë informacion apo kontratë, mes kompaninë mëmë apo edhe asaj që e shkatërroi. Madje, as firmë nga ministria e Infrastrukturës që është edhe aksionere?!
Faksimile: Firma Shijaku Grup i shet truallin e ARMO-s kompanisë Gjonaj me vlerë 1.9 milionë euro
Çuditë me truallin e ARMO-s nuk u ndalën, pasi pasi u shkatërrua dhe u “vodh” një pasuri e madhe e shtetit, duke lënë pas mbi 500 milionë euro borxhe, ai u shit.
Firma që i mori hekurat, Shijaku ia shiti firmën Gjonaj Grup.
Sipas dokumenteve që disponon VoxNews, transaksioni është bërë në datën 1 nëntor 2023. Shitës janë Shpëtim, Bilal dhe Petrit Shijaku. Madje, firmë kanë vënë edhe bashkëshortet e tyre për këtë kontratë shit-berje kuotash.
Blerës është kompania Ifotelecom Albsolar 3 shpk, përfaqësuar dhe administrator z. Marin Gjonaj. Shitësit dhe blerësit ranë dakort për kompaninë “Greennat Solar Park Ballsh”, e themeluar dhe me pronare nga kompania Shijaku.
Çmimi i shitjes ishte 1.950.000 euro.
Faksimile: Pronar i firmës “Greennat ...” janë aktualisht z. Agron Haxhiymeri dhe z. Marin Gjonaj
Por, kush e bleu truallin e ARMO-s?!
VoxNews shfletoi dokumentet e QKB-së, ku aktualisht rezulton se pronar i truallit të ARMO-s është firma “Infotelecom-Albsolar 3”.
Vetë kjo firmë ka si aksioner me 51 % kompaninë “GJONAJ GROUP HOLDINGS” me pronar z. Marin Gjonaj dhe kompaninë “ALBERG” me pronar z. Agron Haxhiymeri me 49 % të aksioneve.
Aktualisht, firma që menaxhon edhe truallin e ARMO-s është themeluar në datën 27 prill 2023, teksa janë bërë edhe transaksione të tjera.
Duket se, për të humbur gjurmët apo për të kaluar nga njëra dorë në tjetrën, bëhen edhe këto manovra nga frika e ndonjë hetimit të ëmvonshëm.
Nëse kalon disa duar, kush mban përgjegjësi, dora e parë, ata të mesit apo të fundit?
Koha e ka treguar se, nëse një firmë bën këtë manovër, asnjë nuk hetohet! Një skemë e pastër kamuflimi, për të tjetërsuar një nga pronat më të mëdha të shqiptarëve, të vjedhur nga të gjithë.
Faksimile: Pas tjetërsimit të truallit, krerët e qeverisë e shndërruan ARMO-n në një park fotovoltaik
Ndërkohë, pas gjithë këtyre manovrave, në datën 2 korrik 2024, Këshilli Kombëtar i Territorit miratoi një leje ndërtimi për objektin “ndërtimin e centralit gjenerues të energjisë elektrike fotovoltaike, me kapacitet prodhues 100 MW dhe veprave ndihmëse”.
Parku ndodhet në Ballsh dhe porositës dhe zhvillues del kompania “GreeNnat Solar Park Ballsh”, e themeluar nga Shijaku dhe e blerë nga Gjonaj Grup.
Një truall me sipërfaqe prej 732.435 metra katrorë u tejtërsua. Panelet u vendosën në një truall plot 417 mijë metra katrorë, teksa në vendim nuk u dhanë detaje të tjera.
Faksimile: Leja e KKT-së është e firmosur nga kryeministri Edi Rama dhe ministrja e Infrastrukturës dhe Energjisë Belinda Balluku
Kush e firmosi vendimin e KKT-së?!
Në dokumentet që hulumtoi VoxNews rezulton se firmëtarë është kreu i KKT-së, Edi Rama dhe ministrja e Infrastrukturës dhe Energjisë, Belinda Balluku.
Një paradoks i madh, pasi vetë Ministria e Energjisë është aksionere te ARMO e vjetër me 15 përqind.
Nga njëra anë Belluku firmos lejen e KKT-së, por në pronë të ministrisë që ajo drejton!
Ndërkohë, Kamberi* dhe shumë punëtorë të tjerë vijojnë betejën ligjore, ku kanë kundër të gjithë, që nga ish-aksionerët e zhdukur si Rezart Taçi, azerët, bankat, qiraxhinjtë apo edhe firmat aktuale Shijaku apo Gjonaj.
Por, kundër kanë edhe qeverinë. Parku ka filluar të prodhojë energji, por paratë po shkojnë për pronarët dhe jo shtetin (që ka pa marrë qindra miliona euro taksa) apo punëtorët!/ VoxNews
