Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
AKTUALITET
Leka Bungo i kërkon kandidates Aurora Polo të tërhiqet nga gara për drejtuese të RTSH: Këmbëngulja për t’u ulur në karrigen e Drejtorit ju ka errësuar vështrimin! Nuk ju lejon të lexoni as Statutin
n.fPërditësimi i fundit 10 Shkurt 2025, 12:55
Foto ilustruese
TIRANË- Kryetari i Këshillit Drejtues të RTSH-së, Leka Bungo i ka shkruar një letër kandidates për drejtuese të televizionit publik, Aurora Polo që të tërhiqet nga gara. Bungo në letrën e tij thekson se një drejtor i përgjithshëm i RTSH-së duhet të ketë përvojë pune jo më pak se dhjetë vjet, nga të cilat pesë vjet në pozicione menaxhimi në media, institucione publike, në sektorin privat, në shkenca komunikimi, teknologji komunikimi dhe dixhitale. Sipas tij Polo nuk i nuk plotëson kriteret e përcaktuara në ligj që kanë të bëjnë me eksperiencën.
Bungo më tej shkruan se këmbëngulja dhe etja e domosdoshme për t’u ulur në karrigen e Drejtorit të Përgjithshëm i ka “errësuar vështrimin” Polos ndërsa thekson se ajo nuk ka lexuar Statutin. Ai shton se këmbëngulja e saj e pashpjegueshme ka zvarritur procesin zgjedhor për zgjedhjen e Drejtorit të ri të institucionit. Ai gjithashtu e ka këshilluar që të japë dorëheqjen nga gara për emërimin në postin e Drejtorit të Përgjithshëm të RTSH-së
Letra e plotë e Bungos drejtuar Aurora Polos:
“Zonja Polo, Statuti i RTSH-së, ndër të tjera, në Nenin 10, Pika 1, Germa C, saktëson: Drejtori i Përgjithshëm i RTSH-së… duhet të ketë përvojë pune jo më pak se dhjetë vjet, nga të cilat pesë vjet në pozicione menaxhimi NË MEDIA, institucione publike (jo administrative), në sektorin privat, në shkenca komunikimi, teknologji komunikimi dhe dixhitale.”
I njëjti kriter është i detyrueshëm edhe për emërimin e Zv. Drejtorit të Përgjithshëm. Megjithatë, ish-Drejtori i Përgjithshëm, në shkelje të Statutit, ju ka emëruar Zv. Drejtore, dhe ju keni kryer funksionet e saj për disa muaj, edhe pse Këshilli Drejtues, nomenklaturë e të cilit jeni pjesë, ka REFUZUAR emërimin tuaj.
Befas, në një nga mbledhjet e Këshillit Drejtues, ju u emëruat me shumicë votash në pozicionin e Zv. Drejtorit të Përgjithshëm.
Padyshim, emërimi juaj ishte i ligjshëm, pasi vendimi u mor me shumicë votash. Megjithatë, sipas gjykimit tonë, ai ishte i paligjshëm për anëtarët e Këshillit Drejtues. Gjithsesi, në një rast të tillë, ju nuk mund t’i shmangeni përgjegjësisë morale, pasi ishit e vetëdijshme që emërimi ishte në kundërshtim me Statutin e RTSH-së.
2. Kandidatura juaj për Drejtor të Përgjithshëm
Zonja Zv. Drejtore, pas dorëheqjes së Drejtorit të Përgjithshëm, ju keni aplikuar për postin e Drejtorit të Përgjithshëm. E keni bërë këtë edhe pse jeni e vetëdijshme se, ashtu si në rastin e emërimit tuaj të parë, edhe për postin e Drejtorit të Përgjithshëm ekziston e njëjta pengesë ligjore: Kriteri i përcaktuar në Statut – Neni 10, Pika 1, Germa C.
Këmbëngulja dhe etja e domosdoshme për t’u ulur në karrigen e Drejtorit të Përgjithshëm ju ka “errësuar vështrimin”, saqë nuk ju lejon të lexoni as Statutin. Këmbëngulja juaj e pashpjegueshme ka zvarritur procesin zgjedhor për zgjedhjen e Drejtorit të ri të institucionit.
Nëse mendoni se mund ta realizoni pikësynimin tuaj ashtu si atëherë kur u ulët në karrigen e Zv. Drejtorit, gjykoj se gaboheni. Duke u nisur nga sa më sipër, do t’ju këshilloja të jepni dorëheqjen nga gara për emërimin në postin e Drejtorit të Përgjithshëm të RTSH-së. Me respekt, Leka Bungo, Kryetar i Këshillit Drejtues Radio Televizioni Shqiptar (RTSH)”.
