Në ditën e nisjes së gjyqit të themelit për dosjen “Partizani”, ish-kryeministri Sali Berisha ka mohuar akuzat e ngritura...
AKTUALITET
"Manastirliu të japë dorëheqjen!" Vrasja e 14-vjeçarit pranë shkollës "Fan Noli", prindërit njoftojnë protestën të hënën: I detyrohemi Martinit dhe fëmijëve tanë
M.B.Përditësimi i fundit 23 Nëntor 2024, 10:26
TIRANA- Gjashtë ditë pas vrasjes së 14-vjeçarit Martin Cani, shumë prindër janë mbledhur paraditen e sotme pranë shkollës “Fan Noli”. Migen Qiraxhi nga Qëndresa Qytetare ka lexuar para mediave disa kërkesa drejtuar qeverisë, mes tyre dorëheqjen e ministres së Arsimit duke paralajmëruar protestë ditën e hënë në orën 17:00.
“I detyrohemi Martinit, i detyrohemi fëmijëve tanë”, tha Qiraxhi.
Po ashtu ai shtoi se kërkesat nuk janë teka, por domosdoshmëri që të krijohet një shkollë e denjë për fëmijët dhe një shkollim dinjitoz për të gjithë brezat që do të vijnë. Gjithashtu Qiraxhi tha se prindërit nuk do të largohen nga sheshi derisa kërkesat të plotësohen duke shtuar se nëse ministria dhe qeveria vijon me neglizhojmë do të konsiderojnë edhe bojkotin e mësimit si formë të reagimit.
“Kjo dorëheqje do krijonte precedent dhe modelin e të mbajturit përgjegjësi. Kjo gjë nuk do të mjaftonte po do hapte një shteg drejt zgjidhjes së kësaj drame. Kësaj shkolle i kishim besuar edukimin e më të shtrenjtëve të saj ndërsa ata nuk arritën ti mbrojnë as jetën. Kjo ministre nuk ofron veç zgërdhirje dhe arrogancë, kur artikuluam kërkesat tona për shkollë më të mirë për të krijuar një shoqëri më të mirë nesër.
Ne do jemi të hënën para ministrisë së Arsimit për të thënë se nuk e tolerojmë këtë model dhe nuk do të presim që një ngjarje tjetër të ndodhë. Nuk është rrufe në qiell të hapur por sinjal për secilin pre nesh që të reagojë sa nuk është vonë.
Kërkesat nuk janë tekat tona, por domosdoshmëri që të krijojmë një shkollë të denjë për fëmijët tanë dhe një shkollim dinjitoz për të gjithë brezat që do të vijnë. Ne si prindër zotohemi se nuk largohemi nga sheshi derisa kërkesat të plotësohen, nëse ministria dhe qeveria vijon me neglizhojmë konsiderojmë edhe bojkotin e mësimit si formë të reagimit tonë", tha Qiraxhi.
