Mbante kallashnikov e municion luftarak në banesë, arrestohet 62-vjeçari në Rrëshen (EMRI)

Foto ilustruese

RRËSHEN - Gjergj Hila, 62-vjeç është arrestuar ditën e sotme nga Policia në Rrëshen, pasi akuzohet për armbëmbajtje pa leje. Policia bën me dije se gjatë kontrollit në banesën e Hilës në fshatin Shëngjergj, janë gjetur dhe sekuestruar 1 armë zjarri kallashnikov me krehër dhe fishekë që posedoheshin pa leje. Si rezultat Hila është vënë në pranga dhe është shoqëruar për veprime të mëtejshme proceduriale.

Njoftimi i Policisë:

Rrëshen/Vijon intensivisht megaoperacioni “Sundimi i ligjit”, kundër armëmbajtjes pa leje.

Mbante në banesë 1 kallashnikov, si rezultat i inteligjencës policore, kapet në flagrancë dhe vihet në pranga poseduesi i armës. Sekuestrohet arma e zjarrit me municion luftarak. Si rezultat i administrimit të menjëhershëm të informacioneve nga inteligjenca policore, të siguruara në kuadër të megaoperacionit “Sundimi i ligjit”, se një shtetas mbante pa leje, armë zjarri, në banesën e tij në fshatin Shëngjergj, shërbimet e Komisariatit të Policisë Mirditë finalizuan operacionin policor të koduar “Zona”.

Gjatë operacionit u arrestua në flagrancë shtetasi Gj. H., 62 vjeç. Nga kontrollet në banesën e këtij shtetasi, Policia gjeti 1 armë zjarri kallashnikov me krehër dhe fishekë në të, që posedoheshin pa leje. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.

pol arrestim rreshen