"Me urdhër të Gjykatës së Posaçme!" Shoqërohet në polici Safet Bajri

SHKODRA- Safet Bajri është shoqëruar nga policia ditën e sotme. Bëhet me dije se Bajri është shoqëruar me urdhër të Gjykatës së Posaçme. Disa ditë më parë forcat RENEA kryen kontrolle në banesën e Safet Bajrit. Pas aksionit në banesën e Safet Bajrit reagoi edhe avokati i tij, i cili u shpreh se “nuk ka asnjë provë që e lidh me asnjë grup kriminal”.

Gjithashtu dy ditë më parë vetë Safet Bajri bëri një dalje për mediatike në emisionin "Top Story" nga ku mohoi gjithçka duke deklaruar se emri i tij po keqpërdoret dhe se nuk ka lidhje me asnjë ngjarje kriminale. I pyetur se përse RENEA kishte kryer kontrolle në banesën e tij, ai u shpreh se sa herë që efektivët kanë shkuar në banesën e tij, ai u ka vënë në dispozicion kamerat e sigurisë.

Bajri është përfolur për një konflikt të përgjakshëm me familjen Lici me pasojë disa të vrarë në atentate, dhe për këtë ai tha se “nuk ka pasur kurrë konflikte me këtë familje”. I pyetur në lidhje me pasuritë e tij dhe nëse ka pasur sekuestrim, ai tha se çdo gjë është e verifikueshme dhe se nuk ka pasur asnjëherë sekuestrime.

“Në lidhje me masakrën e Dobraçit unë ua kam dhënë kamerat. Unë me atë familje nuk kam pasur kurrë asnjë problem. Asnjëherë në jetë nuk kemi pasur probleme me familjen Lici. Konflikti me familjen Lici nuk ekziston. Njerëzit mund të kenë inat pse unë kam shok x apo y… Unë Asmer Bilalin e kam shok dhe nuk e mohoj. Kurrë në jetë nuk i kam ndërhyrë në probleme dhe as nuk e lejoj të më ndërhyjë në problemet e mia”, tha Bajri.

safet bajri