Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
AKTUALITET
Mori përpara 9 automjete dhe një motor ku po udhëtonte një efektiv, Imer Krrashi lihet në burg
PiranjatPërditësimi i fundit 8 Tetor 2025, 12:36
Gjykata e Tiranës ka vendosur masën e sigurisë “arrest me burg” për Imer Krrashin, i njohur edhe si Uka, i cili u arrestua pas një ndjekjeje të rrezikshme policore në zonën e Liqenit të Thatë në Tiranë. 31-vjeçari, person me precedentë penalë, tentoi t’i shpëtonte ndalimit policor duke drejtuar mjetin me armë në makinë, duke shkaktuar kaos në trafik dhe disa të lënduar.
Ngjarja ndodhi pasditen e disa ditëve më parë, kur patrulla e policisë ndaloi automjetin që drejtohej nga Krrashi për një kontroll rutinë. Pasi efektivët e pyetën nëse kishte armë apo sende të paligjshme dhe e urdhëruan të zbresë nga makina për kontroll fizik, ai u largua me shpejtësi, duke injoruar urdhrat e policisë.
Gjatë ndjekjes, Krrashi u përplas me disa mjete të tjera dhe një motor, ku mbetën të lënduar një efektiv policie jashtë shërbimit dhe bashkëshortja e tij. Në fund, policia arriti ta ndalojë dhe t’i sekuestrojë armën e zjarrit që mbante pa leje, një pistoletë, që ndodhej në mjetin e tij.
Para gjykatës, Krrashi shprehu pendesë dhe kërkoi falje për veprimet e tij, duke theksuar se ishte në një gjendje të rënduar emocionale.
“Jam penduar për ngjarjen. Kam qenë në gjendje paniku dhe ankthi, nëna ime vuan nga kanceri, ndërsa babai ka ndërruar jetë pak kohë më parë. Marr mjekime për ankthin dhe depresionin. Jam gati të paguaj dëmet ndaj personave të lënduar dhe të dëmshpërblej për çdo pasojë të shkaktuar,” – deklaroi ai në sallën e gjyqit.
E kaluara kriminale në Itali
Imer Krrashi është një emër i njohur për drejtësinë, veçanërisht në Itali, ku është dënuar më parë për vjedhje si pjesë e grupit të Edison Pulës. Të dy u arrestuan në shkurt të vitit 2022, pasi ishin të dyshuar për dhjetëra grabitje në rajonin e Trentinos.
Një nga ngjarjet më të bujshme që lidhet me grupin kriminal ishte më 14 nëntor 2021, në Marok, ku ata dyshohet se kishin hyrë me forcë në vilën e biznesmenit italian Giancarlo Miotto.
Aktualisht, Krrashi ndodhet në paraburgim dhe do të përballet me akuzat për armëmbajtje pa leje, mosbindje ndaj urdhrit të policisë, si dhe shkaktim aksidenti me pasojë plagosjen e dy personave. Hetimet për rrethanat e plota të ngjarjes vijojnë.
