Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
AKTUALITET
Pas një ndjekjeje spektakolare, 32-vjeçari shqiptar bie në 'çarkun' e autoriteteve greke
PiranjatPërditësimi i fundit 8 Tetor 2025, 11:44
Një 32-vjeçar shqiptar është arrestuar pasditen e së martës (7 tetor) në Maroussi të Greqisë, pas një ndjekjeje spektakolare nga policia greke. Sipas raportimeve të protothema.gr, i riu rezulton me precedentë të shumtë penalë dhe i ishte ndaluar hyrja në Greqi, por gjithsesi kishte arritur të lëvizte i lirë në vend.
Autoritetet greke bëjnë me dije se i arrestuari ka rënë në prangat e policisë plot 10 herë për vepra të ndryshme penale, ndërsa së fundmi u kap duke drejtuar një automjet të vjedhur.
Ngjarja nisi rreth orës 14:10, kur policia u njoftua për një tentativë vjedhjeje në Rrugën Mesogeion. Efektivët u drejtuan menjëherë në vendngjarje dhe identifikuan një automjet të dyshimtë në Rrugën Neratziotissis, të cilit i kërkuan të ndalonte.
Drejtuesi i mjetit, 32-vjeçari shqiptar, nuk iu bind urdhrit dhe u largua me shpejtësi, duke nisur një ndjekje policore që përfundoi në kryqëzimin e rrugëve Folegandros dhe Smyrnis, ku ai braktisi automjetin dhe u përpoq të arratisej në këmbë.
Pasagjeri që ndodhej me të, mori drejtimin e mjetit dhe u largua, ndërsa shqiptari u arrestua pak minuta më vonë falë ndihmës së një oficeri policie jashtë detyrës.
Automjeti i vjedhur u gjet më vonë i braktisur në rrugën Iras. 32-vjeçari tashmë përballet me akuzat për tentativë vjedhjeje dhe mosbindje ndaj urdhrave të policisë, ndërsa pasagjeri që ndodhej me të është ende në kërkim nga autoritetet greke.
