Erjon Vishkulli, i riu që mbeti i plagosur në sy nga një plumb gome gjatë protestës, ka pësuar hemorragji gjatë ndërhy...
AKTUALITET
Vëllezërit shqiptarë krijuan “perandori droge” në qytete të Britanisë. Kush janë ata dhe bashkëpunëtorët (emrat-Foto)
PiranjatPërditësimi i fundit 13 Shkurt 2026, 17:41
Katër anëtarë të një grupi të krimit të organizuar të përfshirë në prodhimin dhe furnizimin në shkallë të gjerë të kanabisit janë burgosur për më shumë se 11 vjet. Dënimi pason një hetim që zbuloi se grupi i strukturuar kriminal shqiptar (OCG) kishte realizuar mbi 500 mijë paund fitime gjatë periudhës 2023–2025.
Grupi drejtohej nga dy vëllezër, Sefedin dhe Eldi Tafa, të cilët qëndronin në krye të organizatës, duke kontrolluar plantacionet e kultivimit dhe duke siguruar materialet dhe pronat e nevojshme.
Krahas vëllezërve Tafa ishte edhe Servet Dobrushi, i cili organizonte shitjen e kanabisit të prodhuar. Në nivelin pasues qëndronin bashkëpunëtorët e besuar, Asterjo Sata dhe Reols Havalj, të cilët mbikëqyrnin plantacionet dhe transportonin kanabisin si edhe fitimet në para në të gjithë vendin.
Grupi përdorte gjithashtu një broker sigurimesh të quajtur Simon Jackson, detyra e të cilit ishte të krijonte polica të rreme sigurimi për automjetet, duke i bërë ato të dukeshin të ligjshme dhe duke mundësuar vazhdimin e aktiviteteve të paligjshme në mënyrë të fshehtë. Një numër personash të tjerë, roli i të cilëve ishte në nivele më të ulëta të zinxhirit – duke përfshirë kultivimin e plantacioneve si “kopshtarë” – janë identifikuar dhe tashmë janë përballur me drejtësinë.
Shkatërrimi i plantacionit
Plantacioni i kanabisit u çmontua pasi u nis një hetim, kur policia zbuloi një “shtëpi bari” në Aragon Close, Southend, në orët e para të 30 gushtit 2023. Brenda pronës u gjetën bimë kanabisi, një qese kanabisi e paketuar me vakum, një qese me kanabis të grirë, 5,000 paund para në dorë, si dhe një portofol që përmbante një patentë drejtimi në emër të Eldi Tafës.
U gjet gjithashtu një bllok shënimesh me shifra dhe emra të shkruar me dorë, ku përfshiheshin emrat “Alberti”, “Sefi” dhe “Olsi”. “Olsi” ishte nofka që grupi përdorte për t’iu referuar Havalajt.
Gjurmë gishtash që i përkisnin Havalajt u zbuluan në ekranin e një telefoni të gjetur në sirtarin e dhomës së parë të gjumit në atë adresë, si dhe në anën e një kavanozi me monedha në të njëjtën dhomë.
Në total, në këtë adresë u gjetën 446 bimë kanabisi, të cilat ishin të shëndetshme, të dendura dhe të mirëmbajtura. Nëse do të shiteshin në sasi kilogramësh, vlera e tyre u vlerësua deri në 118,050 paund. Paratë e sekuestruara iu nënshtruan ekzaminimit forenzik dhe në kartëmonedha u zbuluan gjurmë gishtash që i përkisnin Satës.
Operacioni i gjerë
Njësia kundër krimit të rëndë dhe të organizuar arriti më pas të zbulojë një operacion më të gjerë, i cili shtrihej nga Southend deri në Uells. Sefedin Tafa u arrestua në fillim të vitit 2024. Automjeti Audi me të cilin ai udhëtonte u kontrollua dhe atij iu gjetën 1,460 paund para në dorë. Në telefonin e tij celular u zbulua një video-mesazh i dërguar atij, që tregonte një xhiro brenda një ambienti ku kultivohej kanabis.
Gjatë kontrollit të kësaj shtëpie u gjetën pothuajse 50 gramë kanabis (lule) dhe 27,720 paund. Të gjitha u sekuestruan. Anëtarë të tjerë të grupit u arrestuan në Caerphilly, Uells, ku u sekuestruan 10 kilogramë kanabis me një vlerë deri në 52,000 paund.
Asterjo Sata u arrestua në qershor 2024, ndërsa po drejtonte një automjet nga Brighton drejt Southend. Gjatë kontrollit të mjetit, oficerët gjetën një qese që përmbante 34,320 paund para në dorë, një armë zjarri (pistoletë) dhe dy telefona. Kur u kontrollua banesa e tij, u gjetën shumë sende veshjeje me vlerë të lartë, një orë dore dhe çanta, si dhe fatura të mallrave luksoze, të cilat u sekuestruan.
Si pjesë e hetimit në vijim, u ekzekutua një urdhër kontrolli në Rochford Avenue, Westcliff. Gjatë kontrollit të kësaj prone u zbulua një kultivim i sofistikuar kanabisi i shtrirë në tre kate, me një vlerë rreth 35,550 paund. Në tetor 2024 u arrestua në Brentwood brokeri i sigurimeve Simon Jackson.
Një kontroll i mëvonshëm në banesën e tij zbuloi shumë veshje të shtrenjta, atlete dhe shishe shampanje. Mbi 3,000 paund para në dorë u sekuestruan nga shtëpia e tij, së bashku me blloqe shënimesh që përmbanin qindra adresa emaili dhe shifra të shkruara me dorë. Ai rezultoi se kishte gjeneruar 360,000 paund fitime kriminale nga policat mashtruese të sigurimeve.
Eldi Tafa mbetet ende në kërkim dhe fshihet jashtë Mbretërisë së Bashkuar. Puna për ta lokalizuar dhe për ta vënë para drejtësisë vazhdon. Në total, janë sekuestruar 71,780 paund para në dorë dhe 78.5 kilogramë kanabis. Gjithashtu, dokumentacioni tregoi se ishin shitur edhe 80 kilogramë të tjerë kanabis, duke gjeneruar fitime me shumicë mbi 500,000 paund, informon policia.
Dënimet
Grupi u akuzua nga Prokuroria e Kurorës (CPS) dhe pritej të dilte në gjyq në dhjetor, por secili anëtar pranoi fajësinë për veprat penale dhe u dënua këtë të premte në Gjykatën e Kurorës në Basildon.
Sefedin Tafa, 33 vjeç, pranoi fajësinë për komplot për kultivimin e kanabisit dhe komplot për furnizimin me kanabis. Ai u dënua me katër vite e gjysmë burg.
Asterjo Sata, 22 vjeç, pranoi fajësinë për komplot për kultivimin e kanabisit, komplot për furnizimin me kanabis si dhe për përvetësim ose përdorim të pasurisë kriminale. Ai u dënua me 32 muaj burg.
Reols Havalja, 28 vjeç, pranoi fajësinë për komplot për kultivimin e kanabisit, komplot për furnizimin me kanabis dhe për përvetësim ose përdorim të pasurisë kriminale. Ai u dënua me 23 muaj burg dhe pas lirimit do të përballet me procedura dëbimi.
Servet Dobrushi, 34 vjeç, u dënua me 27 muaj burg.
