Gazetari Osman Stafa ka publikuar pamjet nga kamera e sigurisë së një prej bizneseve në zonën e Medresesë, aty ku më herë...
AKTUALITET
''Një Dallëndyshe nuk e bën pranverë''
PiranjatPërditësimi i fundit 26 Korrik 2023, 14:22
Ditën e hënë në 3 korrik, kadastra nuk është më e aksesueshme fizikisht për publikun dhe për askënd tjetër. Nga e hëna , në 3 korrik askush nga ju nuk mund të bëjë asgjë në kadastër. Dhe do ju ftoja ta provonit dhe të shikoni që nuk do të arrini të bëni dot gjë. Pse? Sepse askush brenda në Kadastër nuk do të mundet dot t’ju përgjigjet edhe sikur të dojë. Asnjë nnga kushërinjtë që keni futur në kadastër, asnjë nga miqtë e miqve që keni futur në kadastër. Asnjë nga ata që janë futur në kadastër se medemek kanë dhënë jetën për Partinë Socialiste nuk do ju përgjigjet dot. Pse? Sepse s’do të ketë gjë në dorë. Nga e hëna në 3 korrik, Kadastra do të jetë një makineri digjitale. Kadastra është një dritare përmes e-albanias.
Edi Rama doli shumë i nxehur në 30 qershor për t’u thënë shqiptarëve se atë që e konsideron të njëjtë me Bankën Qëndrore të Republikës së Shqipërisë do ta nxirrte nga kthetrat e korrupsionit. Banka e pronave të shqiptarëve nuk do të ishte në dorën e të korruptuarve. Banka e pronave të Shqiptarëve nga 3 korriku do të ishte e aksesueshme vetëm online.
Kanë kaluar plot 26 ditë nga deklarata e Edi Ramës dhe Dallëndyshe Bicit, por kaloi e hëna e tre korrikut, e hëna e 10 korrikut, e hëna e 17 korrikut, e hëna e 24 korrikut, pra plot katër të hëna, dhe Kadastra nuk është as e shqiptarëve, as e e-albanias, as edhe e vetë Kadastrës.
Banka Qendrore e Pronave të Shqiptarëve NUK ESHTE E AKSESUESHME për askënd.
Ky skandal i madh po kalon në heshtje dhe askush nuk kupton asgjë dhe mjaftohen vetëm me faktin se “nuk punon sistemi”.
Por çfarë ka ndodhur me sistemin që ishte i aksesueshëm në 30 qershor për herë të fundit?
Deri në fillim të korrikut, pronat e shqiptarëve po digjitalizoheshin nëpërmjet një projekti të financuar nga bashkimi evropian në shumën 15 milionë euro. Këta të fundit kishin investuar paisjet, njerëzit, strukturën dhe gjithcka tjetër për të hedhur në platformë digjitale të gjithë ata libra të grisur që gjendeshin skutave të kadastrës. Projekti ishte madhor, me afate të qarta.
Por më kryesorja, asnjë pronë e shqiptarëve, nuk kishte përfunduar, siç ishte kërkuar, në e-albania. Një gjë e mirë në kohën kur vitin e kaluar pas sulmit kibernetik për të cilin qeveria shqiptare fajësoi Iranin, në treg dolën të gjitha të dhënat e shqiptarëve, dhe të gjitha këto të marra nga sistemi e-albania. Askush nuk kishte garanci se nëse pronat e shqiptarëve do të ishin në e-albania nuk do kishin përfunduar në këto duar.
Por ndërsa Rama shpalli se në 3 korrik do të kalonte gjithcka në platformën digjitale të e-albanias, asgjë nuk ka ndodhur.
Dhe ka një arsye.
Që E-albania të marrë gjithë sistemin e pronave të shqiptarëve duhet të hapë një tender të ri. Për tu bërë procedurat e tenderit kërkon shumë kohë, nga 30 qershori në 3 korrik nuk mund të bëhen. E para, kadastra duhet të anulonte projektin me ndërkombëtarët për digjitalizimin dhe më pas të fillojë punën.
Që prej një muaji, asnjë qytetar që kërkon një vërtetim hipotekor nuk e merr dot më. Asnjë shqiptar nuk merr dot më legalizimin e shtëpisë së vetë apo të marrë hipotekën e shtëpisë së vet për të kryer veprime me pronën.
Ndërkohë në E-albania “zjejnë” zërat se kush do të fitojë tenderin miliona euro, qytetarët nuk dinë sesi të zgjidhin hallet e problemet që kanë.
Ndërkohë kryeministri u kap në çark. Kush i premtoi se do të zgjidhej problemi, thjesht e ka vështirësuar atë. Përfundimisht, që prej më shumë se një muaji, në kadastër nuk bëhet asnjë shërbim, e nuk prodhohet asnjë dokument.
Ky skandal, është shumë herë më i madh sesa gjithë skandalet e mëparshme që kanë ndodhur me Bankën e pronave të shqiptarëve.
