Sot vendi ynë do të jetë nën ndikimin e masave ajrore relativisht të qëndrueshme dhe të nxehta.
Moti parashikohet kryesish...
AKTUALITET
"Pasi qëlluan me armë i përplasën me makinë..."/ Zbardhet dinamika e ngjarjes në Fier, arrestohet 66-vjeçari, në kërkim djali i tij
r.llPërditësimi i fundit 10 Prill 2025, 08:52
arrestimi i 66 vjecarit
FIER- Është zbardhur dinamika e ngjarjes së ndodhur ditën e djeshme në Fier, ku mbetën të plagosur nënë e bir, Suzana dhe Hysen Mernica. Sipas informacioneve zyrtare policore, Afrim dhe Ali Cimili qëlluan me armë zjarr në drejtim të tyre, por nga të shtënat nuk pati të plagosur.
Pasi kanë qëlluar me armë, autorët kanë përplasur me makinën e tyre motomjetin ku ndodhenin nënë e bir. Si pasojë e goditjes së motomjetit, Suzana dhe Hysen mbetën të dëmtuar. Ata u dërguan në spital dhe janë në kujdesin e mjekëve jashtë rrezikut për jetën. Ndërkohë në pranga është vënë një nga autorët, 66-vjeçari, Afrim Cimili. Në kërkim vijon të jetë djali i tij, 23-vjeçari, Ali Cimili.
Nga veprimet hetimore ka rezultuar se ngjarja ka ardhur si pasojë e një konflikti të mëparshëm mes Hysen Mernicës dhe Ali Cimilit.
NJOFTIMI I POLICISË:
Fier/Zbardhet dinamika e ngjarjes së djeshme, te mbikalimi i fshatit Dërmenas, ku u dëmtuan 2 shtetas.
Në bashkëpunim me djalin e tij, qëlloi me armë zjarri, në drejtim të 2 shtetasve (nënë e bir), lokalizohet dhe arrestohet 66-vjeçari. Punohet intensivisht për kapjen e djalit të tij.
Nga të shtënat nuk pati shtetas të dëmtuar. Paraprakisht u dyshua se shtetasja S. M. ishte plagosur nga të shtënat me armë zjarri, por nga ekspertiza mjeko-ligjore rezultoi se 2 shtetasit (nënë e bir) u dëmtuan nga goditja e motomjetit me të cilin ata lëviznin, nga automjeti që drejtonte shtetasi i shpallur në kërkim.
Specialistët e Seksionit për Hetimin e Krimeve Kundër Personit, menjëherë pas ngjarjes së ndodhur më datë 09.04.2025, te mbikalimi i fshatit Dërmenas, ku shtetasit A. C., 66 vjeç dhe A. C., 23 vjeç, babë e bir, të dy banues në këtë fshat, dëmtuan shtetasit H. M., 26 vjeç dhe S. M., 50 vjeçe, nënë e bir, të dy banues në fshatin Sulaj, kanë organizuar punën për nxjerrjen e autorëve përpara përgjegjësisë penale dhe për sqarimin e rrethanave të rastit.
Si rezultat i veprimeve të shpejta dhe profesionale hetimore u zbardh dinamika e rastit, si dhe u kap dhe u vu në pranga 66-vjeçari.
Nga këto veprime dyshohet se shtetasit A. C. dhe A. C., për shkak të një konflikti të mëparshëm ndërmjet 23-vjeçarit dhe 26-vjeçarit, kanë qëlluar me armë zjarri, në drejtim të motomjetit me të cilin lëviznin shtetasit H. M. dhe S. M.. Nga të shtënat nuk pati shtetas të dëmtuar. Më pas, 23-vjeçari ka goditur me automjetin me të cilin lëvizte, motomjetin, dhe është larguar nga vendngjarja, së bashku me babanë e tij. Si pasojë e goditjes së motomjetit, janë dëmtuar shtetasit H. M. dhe S. M., të cilët janë në kujdesin e mjekëve dhe jashtë rrezikut për jetën.
Në vendngjarje janë sekuestruar gëzhoja dhe prova që do t’i shërbejnë hetimit për këtë ngjarje. Gjithashtu, janë sekuestruar njëri prej automjeteve të përdorur prej autorëve dhe 3 celularë.
Vijojnë kërkimet për kapjen e 23-vjeçarit.
Materialet procedurale iu referuan Prokurorisë së Fierit, për veprime të mëtjeshme, për veprat penale "Vrasja me paramendim", mbetur në tentativë, kryer në bashkëpunim, dhe "Prodhimi dhe mbajtja pa leje e armëve, armëve shpërthyese dhe municionit luftarak".
