Përndiqte punonjësen e policisë në Vlorë, shpallet në kërkim efektivi

HIMARË - Një punonjës i policisë në Komisariatin e Himarës është shpallur në kërkim pasi akuzohet për përndjekje, dhunë dhe armbëmbajtje pa leje. AMP njofton se efektivi me iniciale F.XH, përndiqte në mënyrë të vazhdueshme një punonjëse të policisë në Komisariatin e Vlorës me automjet, dhe në një rast ka përplasur me automjet, automjetin e saj dhe më pas është larguar me shpejtësi.

Gjiothashtu njoftohet se nga kontrollet në automjetin e tij janë gjetur dhe sekuestruar armë të ftohta, thikë dhe biçak. Përpos përndjekjes, dhe mbajtjes së armëve të ftohta efektivi akuzohet gjithashtu edhe për "Mosbindje ndaj urdhrit të punonjësit të policisë së rendit publik" dhe "Dhunë në familje".

Njoftimi i AMP:

Agjencia e Mbikëqyrjes Policore (Rajoni Vlorë-Gjirokastër) ka shpallur në kërkim punonjësin e Policisë të Komisariatit të Policisë Himarë F.XH., i dyshuar për kryerjen veprave penale "Përndjekje", "Dhuna në familje", "Mosbindje ndaj urdhrit të punonjësit të policisë së rendit publik", si dhe "Prodhimit, mbajtjes, blerjes apo shitjes pa leje të armëve të ftohta".

Ai dyshohet se ka përndjekur në mënyrë të vazhdueshme një punonjëse të policisë në Komisariatin e Vlorës. Konkretisht, në datën 03.05.2024 ka përndjekur përgjatë segmentit rrugor Bulevardi kryesor dhe në "Transballkanike" me automjet punonjësen e policisë duke përplasur automjetin e saj dhe më pas është larguar me shpejtësi, ndërsa mjetin e ka braktisur në Vlorë.

 Nga këqyrja e automjetit u gjetën dhe u sekuestruan në cilësinë e provës materiale 2 armë të ftohta (thikë e biçak), për të cilat u bë vendimi për kryerjen e ekspertimit teknik. Në vijim të veprimeve procedurale, Agjencia ka administruar edhe kallëzimin e punonjëses së policisë.

 AMP-ja në bashkëpunim me DVP Vlorë po punon për kapjen dhe ndalimin e punonjësit të policisë F.XH.

amp himare polici