Situata e zjarreve në vend vijon të jetë problematike, me 27 vatra të raportuara gjatë 24 orëve të fundit.
Tre vatra mbete...
AKTUALITET
"Projektet synojnë forcimin e konkurrencës së sektorit privat dhe zhvillimin e infrastrukturës!" Banka Botërore mbështet Kosovën me 89.7 milionë dollarë për zhvillim ekonomik
M.B.Përditësimi i fundit 18 Janar 2025, 08:09
KOSOVA- Banka Botërore ka njoftuar miratimin e ndihmës financiare prej 89.7 milionë dollarësh (87.2 milionë euro) për dy projekte të reja në Kosovë. Këto projekte synojnë forcimin e konkurrencës së sektorit privat dhe zhvillimin e infrastrukturës së transportit dhe tregtisë. Lajmi u bë i ditur të enjten përmes një deklarate për shtyp nga huadhënësi global. Projektet do të financohen përmes kredisë koncesionare nga Shoqata Ndërkombëtare e Zhvillimit (IDA). Projekti i Zhvillimit të Sektorit Financiar, me një vlerë prej 52 milionë dollarësh, dhe Projekti i Lehtësimit të Tregtisë dhe Transportit (TTFP) 2.0, me një buxhet prej 37.7 milionë dollarësh, do të kontribuojnë në nxitjen e zhvillimit ekonomik dhe përmirësimin e mirëqenies së qytetarëve të Kosovës.
Ky projekt synon të rrisë stabilitetin financiar dhe përfshirjen ekonomike në Kosovë. Përmes tij, do të forcohen kapacitetet e Fondit të Sigurimit të Depozitave, do të sigurohet financim për firmat e pashërbyera dhe do të përmirësohen proceset e pagesave. Projekti synon gjithashtu të ndihmojë ndërmarrjet mikro, të vogla dhe të mesme (NMVM) duke krijuar mekanizma për garanci kredie përmes Fondit Kosovar për Garanci të Kredive. Ky fond pritet të tërheqë deri në 200 milionë dollarë investime nga sektori privat.
Një tjetër objektiv i projektit është themelimi i Bankës Kombëtare për Zhvillim, e cila do të financojë projekte strategjike në përputhje me prioritetet e qeverisë së Kosovës. Fokusi i këtij projekti është në përmirësimin e infrastrukturës dhe sistemeve teknologjike për të ulur kostot e tregtisë dhe për të rritur efikasitetin e transportit. Përmes këtij projekti, do të implementohen sisteme elektronike të tarifave në rrugët kryesore dhe do të përmirësohet siguria në 21 vendkalime hekurudhore dhe një pjesë rrugore me rrezik të lartë. Këto investime do të lehtësojnë tregtinë ndërkufitare dhe do të forcojnë lidhjet ekonomike të Kosovës me vendet fqinje. Massimiliano Paolucci, menaxher i Bankës Botërore për Kosovën dhe Maqedoninë e Veriut, theksoi rëndësinë e këtyre projekteve për zhvillimin ekonomik të vendit.
“Përqendrimi në përmirësimin e qasjes në financa për firmat dhe lehtësimi i lidhjes është një faktor kyç për rritjen dhe krijimin e vendeve të punës, dhe do të sjellë përfitime të qarta për Kosovën dhe qytetarët e saj. Këto projekte paraqesin një hap të rëndësishëm drejt përmirësimit të klimës së biznesit dhe zhvillimit ekonomik në Kosovë, duke synuar krijimin e mundësive të reja për sipërmarrësit dhe forcimin e lidhjeve tregtare të vendit me rajonin dhe më gjerë”./ Monitor
