Projekti Thumanë-Kashar u prek banesat, banorët e Bërxullës hipin mbi tarracë, kërcënojnë se do t’i vendosin flakën veten

Banorët e Bërxullës

TIRANË - Disa banorë të Bërxullës, kanë dalë në protestë paraditen e kësaj të mërkure për të kundërshtuar projektin e ndërtimit të autostradës Thumanë-Kashar, që prek banesat e tyre. Ata kanë hipur në tarracën e një banese dhe kanë kërcënuar se do të arrijnë deri në veprime ekstreme nëse nuk nuk merren parasysh kërkesat e tyre. Me benzinë në dorë ata kërcënojnë se do ti vejnë flakën vetes.

Qytetarët pretendojnë se shteti nuk i dëmshpërblen sipas vlerës së banesave, ndërsa shtojnë se nuk janë fare në skemën e dëmshpërblimit. Ata kanë zhvilluar edhe më herët protesta te vazhdueshme të për të njëjtën problematikë. Në një prononcim për mediat, banorët shprehen se janë mashtruar dhe se në skemën e dëmshpërblimeve kanë hyrë vetëm familjet që kanë paguar para.

“Na kanë nxjerrë jashtë. Duam dëmshpërblimin ose banesa. Nuk ikim nga këtu. Kam bërë gati shishen e benzinës do të digjem këtu. Kanë dy muaj që vijnë rreth shtëpisë tonë. Shteti nuk ka marrë asnjë masë. Edhe në komisariat kur kemi shkuar na kanë përzënë. Jemi 6 familje, 40 persona”, thotë një banor.

“Në fillim na thanë që do të na shpërblenin pastaj na thanë nuk do të merrni asgjë. Nuk na ka ardhur asnjë njoftim. Erdhi një procesverbal dje që na tha lironi menjëherë shtëpinë. Kërkojmë strehim. Nuk kemi ku të shkojmë, jemi në qiell të hapur. Kemi fëmijë ku do të jetojnë ata? Ata që paguan morën, ne jo”, thotë një tjetër.

berxulle proteste