Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
AKTUALITET
Prokuroria nis hetimet për helmimin e 70 fëmijëve në Gramsh, bllokohen kartelat e 6 pacientëve të shtruar në spital
n.fPërditësimi i fundit 25 Maj 2025, 12:17
GRAMSH- Prokuroria e Elbasanit ka nisur hetimet në lidhje me helmimin e 70 fëmijëve në një kopsht në Gramsh. Më tej bëhet me dije se pas njoftimit për helmimin e disa fëmijëve janë sekuestruar në cilësinë e provës kartelat klinike për 6 pacientët e shtruar në spitalin e Gramshit, procesverbalet e kontrollit dhe furnizimit me produkte ushqimore të Kopshtit Nr.1, si dhe janë marrë mostrat nga ushqimi për ekzaminime të mëtejshme në kushte laboratorike.
Është bërë dhe bllokimi i produkteve ushqimore të mbetura në kuzhinën e këtij kopshti. Prindërit thonë se simptomat e fëmijëve kanë nisur që të premten e shkuar, por vetëm sot, AKU kanë marrë mostra të mishit të pulës, qumështit dhe të vezëve. Një prej prindërve është shprehur se ka 2 vajza në kopsht dhe nga ana e strukturave drejtuese janë lajmëruar që të marrin fëmijët pasi është evidentuar një rast me Salmonelë. Sipas tij, ditën e hënë, prindërit kanë njoftuar protestë ndaj autoriteteve përgjegjëse për ngjarjen.
Një nga pistat kryesore të hetimit është furnizuesi i ushqimeve me katering për kopshtin. Mësohet se furnizuesi i ushqimit me katering është kompania “Nelsa shpk”. Kopshti mësohet se ka një kontratë me një operator privat për përgatitjen dhe shpërndarjen e ushqimit. Ky subjekt dyshohet se ka rezultuar më parë me shkelje të rregullave higjeno-sanitare gjatë një inspektimi të AKU-së në vitin 2023, por ka vijuar të operojë normalisht.
Në kuzhinën e kopshtit nuk kishte frigoriferë funksionalë për ruajtjen e produkteve të ndjeshme si mishi dhe qumështi një fakt i konstatuar edhe nga specialistë të AKU-së që kanë ndërhyrë pas incidentit. Përveç furnizimit me ushqime katering të çerdheve, kopshteve dhe konviktit të shkollës së mesme në bashkinë Gramsh, “Nelsa shpk” furnizon me ushqime dhe spitalet e burgjet. Administratorja e “Nelsa SHPK” ka folur në lidhje me ngjarjen. Në një prononcim telefonik, Elsa Kamberi Balla shprehet se ata furnizojnë me ushqimet bazë kopshtin në fjalë, si bulmetra, mishi,etj. • Ajo shton se produktet e ofruara janë të kontrolluara.
