Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
AKTUALITET
Qëlloi me armë jashtë gjykatës në Gjermani teksa mbahej seanca për autorin e vrasjes së boksierit, dorëzohet në polici motra e Besar Nimanit
n.fPërditësimi i fundit 3 Mars 2025, 18:13
GJERMANI- Motra e të ndjerit Besar Nimani është dorëzuar në polici lidhur me të shtënat me armë zjarri që ndodhën më 26 shkurt në Gjermani para gjykatës ku po mbahej seanca gjyqësore në ngarkim të të pandehurit, Huseyin Akkurt për vrasjen e boksierit shqiptar. Motra e boksierit dyshohet se qëlloi me armë zjarri në shenjë hakmarrje babain dhe vëllain e autorit të dyshuar të vrasjes teksa zhvillohej seanca gjyqësore. Vëllai i Akkurt mësohet se është qëlluar në këmbë, ndërsa i ati është qëlluar në mushkëri dhe është në gjendje kritike për jetën.
Policia e Bielefeldit në Gjermani ka njoftuar sot se motra e boksierit është vetdorëzuar, pasi ishte në arrati që nga dita e sulmit bashkë me vëllain tjetër, Beratin i cili edhe ai është dorëzuar në polici pas ngjarjes. Policia thekson se përfshirja e saktë e 33-vjeçares në ngjaje është ende nën hetim.
“Një grua 33-vjeçare nga Bielefeld, e kërkuar nga policia dhe prokuroria publike në bazë të një urdhër-arresti, është vetëdorëzuar në policinë e Bielefeldit mbrëmjen e 28 shkurtit 2025, e shoqëruar nga avokati i saj. Gruaja është motra e vëllait të ish-boksierit të vrarë. Përfshirja e saj e saktë në krim është ende nën hetim”, thuhet në deklaratën e policisë.
Besar Nimani ishte boksier i suksesshëm në Gjermani, por kishte shumë probleme me një grup, të cilët e vranë teksa po hynte në një lokal të zonës, pasi parkoi mjetin e tij “BMW”. Për krimin po gjykohet një shtetas kurd, Huseyin Akkurt dhe në kërkim është shpallur një person i dytë.
