Salianji ankimon në Gjykatën e Lartë dënimin me 1 vit burg/ Avokatët dorëzojnë mbi 100 faqe argumente ligjore kundër vendimit të Apelit, caktohet relatori i çështjes

ervin salianji

TIRANË- Ish-deputeti i Partisë Demokratike, Ervin Salianji ka kundërshtuar në Gjykatën e Lartë vendimin e Gjykatës së Apelit, e cila e dënoi me 1 vit burg. 

Avokatët mbrojtës të Salianjit kanë dorëzuar mbi 100 faqe argumente ligjore ku kundërshtojnë shkallën e dytë të gjyqësorit që e burgosi nën akuzën për kallëzim të rremë. Bëhet me dije se relatori i çështjes është caktuar gjyqtarja Albana Boksi ndërsa ende nuk është caktuar data apo ora. Aktualisht Salianji po vuan dënimin e tij në burgun e Fierit.

Gjykata e Apelit ka lënë në fuqi më 26 shtator 2024 vendimin për dënimin me 1 vit burg për deputetin demokrat Ervin Salianji. Salianji është dënuar së bashku me Albert Veliun, që pritet të vuaj dënimin me 10 muaj burg si dhe gazetarin Jetmir Olldashi me 100 orë punë komunitare. Apeli ka lënë në fuqi vendimin e Gjykatës së Shkallës së Parë në Tiranë. Shkalla e parë vendosi që Salianji të dënohet për kallëzim të rrëmë, në lidhje me një denoncim që ka bërë për vëllanë e ish-Ministrit të Brendshëm Fatmir Xhafa, Agron Xhafa. Në audio-përgjimin që publikoi Salianji, thuhej se Agron Xhafa ishte pjesë e një rrjeti kriminal të trafikut të lëndëve narkotike.

ervin salianji gjykata e larte