Në ditën e nisjes së gjyqit të themelit për dosjen “Partizani”, ish-kryeministri Sali Berisha ka mohuar akuzat e ngritura...
AKTUALITET
Trump deklaroi se paracetamoli shkakton autizëm te gratë shtatzëna, Skënder Brataj sqaron të vërtetën
PiranjatPërditësimi i fundit 28 Shtator 2025, 16:15
Deklarata e presidentit të SHBA, Donald Trump, që sugjeron se përdorimi i paracetamolit nga gratë shtatzëna mund të shkaktojë autizëm te foshnjat, ka shkaktuar tronditje të gjerë në mbarë botën. Megjithatë, Skënder Brataj, kreu i Urgjencës Kombëtare, ka hedhur poshtë këto pretendime dhe ka theksuar se nuk ka asnjë provë shkencore që të mbështesë lidhjen mes paracetamolit dhe autizmit te fëmijët.
Në një intervistë televizive, Brataj u shpreh se paracetamoli është një medikament i njohur dhe i përdorur prej shumë vitesh për trajtimin e dhimbjeve dhe temperaturës, i cili është konsideruar gjithmonë i sigurt për përdorim nga gratë shtatzëna, për sa kohë përdoret në dozën e rekomanduar. Ai theksoi se përkundër deklaratave të tilla të pabazuara, asnjë studim shkencor nuk ka arritur të dëshmojë ndonjë lidhje shkak-pasojë mes këtij ilaçi dhe rritjes së rrezikut për autizëm.
Brataj theksoi gjithashtu se për të siguruar shëndetin e nënës dhe të foshnjës, është e rëndësishme që gratë shtatzëna të konsultohen me mjekët për çdo ilaç që planifikojnë të përdorin, duke shmangur informacionet dhe pretendimet e paqëndrueshme që mund të krijojnë konfuzion dhe frikë të panevojshme.
"E kanë lidhur me një studim të bërë në Suedi. Politika kur do të tërheqë vëmendjen e gjen. Gratë që kryesisht kanë përdorur paracetamolin, kanë pasur tendecë, por kjo nuk është vërtetuar. Është parë një lidhje që është marrë, por jo asnjë lidhje që; ka infeksion apo inficencë. Paracetamoli është një ndër medikamentet më të vjetër, dhe ky është një studim, si mund ta marrim të mirëqenë! Nuk është shkak pasojë. Siç reaguan shoqatat e barnave në botë, që e kundërshtuan sepse s’ka prova shkak-pasojë. Paracetamoli lejohet në shtatzëni. Çfarë shkakton temperatura e lartë te gruaja? Dehidratim, dëmtime respiratorë. Çfarë i shkaktojnë fetusit? Shkaktohen dëmtime cerebrale, në rast të temperaturave të larta. Them se duhet të mbështetemi te gjetjet e shëndetësisë dhe jo te politika për këto çështje.
Gruaja shtatzënë nuk duhet ta teprojë me paracetamolin. Nuk duhet të marrin pa kriter dhe varet se çfarë temperature kanë. Më mirë të marrin paracetamol kur temperatura është mbi 38.5.”.
