"U thirrën 125 dëshmitarë dhe u sollën materiale në shumë gjuhë!" Prokuroria Speciale përfundon paraqitjen e provave për Thaçin dhe 3 ish-krerët e UÇK-së

HAGË- Zyra e Prokurorit të Specializuar ka përfunduar paraqitjen nga ana e provave në gjyqin ndaj ish-presidentit të Kosovës Hashim Thaçi, Kadri Veselit, Rexhep Selimit dhe Jakup Krasniqit. Në procesin e paraqitjes së provave të saj, Zyra e Prokurorit të Specializuar thirri për të dhënë dëshmi drejtpërdrejtë në sallën e gjyqit 125 dëshmitarë.

Raportohet se Zyra e Prokurorit të Specializuar paraqiti rreth 3 000 prova materiale në shumë gjuhë dhe ka bërë deri më sot 1 430 parashtresa lidhur me këtë çështje gjyqësore. Thaçi, Veseli, Selimi dhe Krasniqi akuzohen për krime kundër njerëzimit dhe krime lufte, përfshirë vrasjen e më shumë se 100 viktimave si dhe mbajtjen në paraburgim në mënyrë të paligjshme e torturimin e qindra viktimave.

Sipas aktakuzës, krimet u kryen kundër qindra civilëve dhe individëve që nuk ishin pjesëmarrës në luftime në një periudhë prej të paktën marsit të vitit 1998 deri në shtator të vitit 1999 në shumë vende në të gjithë Kosovë dhe në Shqipërinë e veriut. Në këtë gjyq janë pjesëmarrës më shumë se 150 viktima dhe ata përfaqësohen nga Avokati i Viktimave.

uck