Protestat në Tiranë vijojnë me përplasje mes demonstruesve dhe policisë së rendit, shkruan BBC. Nxënësit e shkollave t...
AKTUALITET
Vdekja e pacientes për shkak të ndërhyrjes kirurgjikale në stomak/ Kirurgu Ilir Shani: Operacioni përfundoi normalisht dhe pacientja u transferua në pavijon në gjendje të mire! Të nesërmen në mëngjes pësoi arrest kardiak
E.DPërditësimi i fundit 22 Maj 2025, 15:47
TIRANË- Kirurgu Ilir Shani ka reaguar lidhur me vdekjen e Valbona Xhazejnos, e cila ndërroi jetë pas një ndërhyrje kirurgjikale për zvogëlimin e stomakut në klinikën 'Villa Alba'. Kirurgu Shani, i cili është nën hetim lidhur me vdekjen e 54-vjeçares, ka deklaruar se operacioni përfundoi normalisht dhe pacientja u transferua në pavijon në gjendje të mire.
Kirurgu thekson se gjatë orëve në vijim, gjendja e saj u monitorua vazhdimisht dhe parametrat jetësorë rezultuan brenda normave. Por sipas mjekut të nesërmen pacientja ka pësuar një arrest kardiak të menjëhershëm. Kirurgu thekson se pavarsisht ndihmës mjekësore që iu ofrua menjëherë, goditja rezultoi fatale dhe përpjekjet për ta rikthyer në jetë nuk patën sukses.
"Në vijim të ngjarjes së rëndë që ndodhi para dy ditësh në ambientet e spitalit tonë, ndjej për detyrë morale dhe profesionale të paraqes një sqarim mbi pozicionin tonë si institucion shëndetësor dhe timin personalisht si mjek përgjegjës. Së pari, në emër të stafit mjekësor dhe në emrin tim personal, i shpreh ngushëllimet familjarisht më të sinqerta familjes së të ndjerës V.XH. Kjo humbje është thellësisht e dhimbshme për të gjithë ne, pasi e ndjera ishte jo vetëm paciente, por edhe një e njohur e afërt e jona për të cilën ushqenim respekt të veçantë. Ndajmë dhimbjen dhe qëndrojmë pranë familjarëve në këtë moment të vështirë.
Si mjek përgjegjës, ndjej detyrimin të sqaroj rrethanat e kësaj ngjarjeje të trishtë, duke u udhëhequr nga parimi i transparencës ndaj familjarëve dhe qytetarëve. Pacientja V.XH iu nënshtrua ndërhyrjes kirurgjikale të ngushtimit te stomakut më datë 20.05.2025. Operacioni përfundoi normalisht dhe pacientja u transferua në pavijon në gjendje të mire. Gjatë orëve në vijim, gjendja e saj u monitorua vazhdimisht dhe parametrat jetësorë rezultuan brenda normave.Pacientja ishte aktive , lëvizte , komunikonte , nuk kishte asnje shqetesim. Fatkeqësisht, ne te gdhirë te dates 21 , pacientja pësoi një arrest kardiak të menjëhershëm, pasojë e një infarkti akut masiv, dhe ndërroi jetë brenda pak minutash.
Megjithëse ndihma mjekësore u ofrua menjëherë , goditja rezultoi fatale dhe përpjekjet për ta rikthyer në jetë nuk patën sukses. Në emër të vetes dhe të të gjithë stafit që ka qenë i përfshirë në trajtimin e pacientes, shpreh keqardhjen më të thellë për këtë humbje. E kuptojmë dhe ndjejmë dhimbjen e familjes dhe jemi të gatshëm të ofrojmë bashkëpunimin e plotë me organet përkatëse, të cilat do të hedhin dritë mbi çdo aspekt të kësaj ngjarjeje. Me respekt dhe përulësi para dhimbjes së familjes, Ilir Shani," tha kirurgu Ilir Shani.
