Vrasja e biznesmenit Ardian Nikulaj/ Kërkoi lirimin, Gjykata e Lezhës lë në burg portugezin Ruben Saraiva

LEZHA- Paraditen e sotme u zhvillua seanca gjyqësore në ngarkim të portugezit Ruben Saraiva të akuzuar si vrasës me pagesë i biznesmenit Ardian Nikulaj në Lezhë. Bëhet me dije se seanca gjyqësore për Ruben Saraivën përfundoi pas një ore, teksa Gjykata e Lezhës rrëzoi kërkesën e tij dhe vendosi që portugezi të qëndrojë në burg, për akuzën e vrasjes.

Gjithashtu mësohet se pasi dëgjoi palët, ku prokurori kërkoi lënien në fuqi të masës pasi nuk kishte ndryshuar asnjë element penal dhe juridik, Gjykata la në fuqi masën e vendosur “arrest me burg”. Avokati i portugezit e konsideron vendimin e padrejtë, pasi nuk ka asnjë provë që e implikon klientin e tij në këtë ngjarje.

Ardian Nikulaj u vra më 19 prill 2023 brenda lokalit të tij në Shëngjin. Porositës dhe organizator është Edmond Haxhia i cili ka rënë në pranga, së bashku me tre britanikë Thomas Mithan, Steve Hunt dhe Harriet Bridgeman. Të katër këta janë prangosur, pasi autoritetet britanike kanë pranuar si të ligjshme kërkesën e bërë nga Policia e Shtetit shqiptar.

Ruben Saravia iku nga Shqipëria përmes Doganës së Kapshticës, bashkë me britanikun Harry Simson, në drejtim të Greqisë. Nuk dihet se çfarë rruge ka ndjekur portugezi për të mbërritur deri në Marok. Britanikët dyshohet se kanë qenë informatorë, ata kanë qëndruar pikërisht në resortin në pronësi të biznesmenit Ardian Nikulaj dhe sipas hetuesve, ata kanë vëzhguar për ditë me radhë lëvizjet e tij dhe të stafit, të cilat më pas ia raportonin portugezit Ruben Saraiva.

lezha