Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
AKTUALITET
Vrau Flori Paluçin, pasi ai qëlloi për vdekje kamarierin Aranit Kurti/ Publikohet foto e Daniel Pepës
PiranjatPërditësimi i fundit 23 Tetor 2025, 15:30
Është publikuar foto e 21-vjeçarit Daniel Pepa, i cili është shpallur në kërkim nga policia, pasi akuzohet për vrasjen e 33-vjeçarit Flori Paluçi. Ngjarja ka ndodhur në orët e para të mëngjesit të së mërkurës, kur një konflikt në një lokal, përfundoi tragjikisht me humbjen e jetës së Paluçit dhe një tjetër viktimë, Aranit Kurti, i cili u qëllua me armë nga Flori Paluçi.
Për veprat penale "Vrasja me dashje" dhe "Mbajtja pa leje dhe prodhimi i armëve", Daniel Pepa është shpallur në kërkim, ndërkohë që një tjetër person, G. A., 30 vjeç, është gjithashtu shpallur në kërkim për "Mbajtja pa leje dhe prodhimi i armëve", "Përkrahja e autorit të krimit" dhe "Moskallëzimi i krimit".
Dinamika e ngjarjes
Sipas të dhënave nga grupi hetimor, Daniel Pepa së bashku me Arianit Kurtin kanë shkuar në lokal dhe Danieli i ka kërkuar kamarierit të lokalit që t’i bënte një kafe. Kamarieri i është përgjigjur që ekspresi ishte i fikur dhe se nuk mund të bënte kafe. Më pas, sipas informacioneve, Danieli i ka kërkuar që ta ndizte ekspresin duke përdorur edhe fjalë fyese në drejtim të kamarierit.
Aty ka ndërhyrë Flori Paluçi, i cili i ka thënë që ti nuk mund ta fyesh, pasi kamarieri është ulur në tavolinë me mua. Pas këtij momenti kanë nisur debatet verbale mes tyre dhe kanë degjeneruar deri në përdorimin e armës së zjarrit.
I pari që ka qëlluar është Flori Paluçi, i cili ka vrarë Arianit Kurtin, dhe më pas Daniel Pepa ka qëlluar duke lënë të vrarë Paluçin.
Daniel Pepa si duket, ka shpallur "armiqësi" me ligjin, ndërkohë që policia po vijon hetimet për zbardhjen e plotë të ngjarjes dhe gjetjen e tij. Ndërkohë, po punohet për të hetuar gjithashtu përfshirjen e shtetasit G. A., i cili dyshohet se ka marrë pjesë në krim.
