Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
BOTA
Agjencia e Energjisë Atomike: Ekziston rreziku bërthamor nga sulmet në Ukrainë
n.fPërditësimi i fundit 4 Shkurt 2025, 18:48
UKRAINË- Sulmet në rrjetin elektrik të Ukrainës mund të krijojnë rrezikun e një aksidenti bërthamor nga një ndërprerje e energjisë. Kështu paralajmëroi kreu i Agjencisë Ndërkombëtare të Energjisë Atomike (IAEA) Rafael Grossi i cili mbërriti sot në Kiev ku inspektoi një nënstacion të energjisë.
"Unë jam në nënstacionin Kiivska, i cili përbën një pjesë të rëndësishme të rrjetit elektrik të Ukrainës thelbësore për sigurinë bërthamore," shkroi Grossi në platformën X. “Një aksident bërthamor mund të jetë rezultat i një sulmi të drejtpërdrejtë në termocentral, por mund të shkaktohet edhe nga ndërprerja e furnizimit me energji elektrike”.
Grossi postoi foto të tij duke vizituar nënstacionin me ministrin e Energjisë, German Galushenko, i cili po i tregonte atij mjetet për të kundërshtuar sulmet ruse.
Moska, gjatë pushtimit të saj tre-vjeçar, ka bombarduar vazhdimisht infrastrukturën energjetike të Ukrainës, duke përfshirë nënstacionet, megjithëse ka shmangur goditjet e drejtpërdrejta në termocentralet bërthamore të Ukrainës. Grossi tha se do të vizitojë Rusinë më vonë këtë javë për të diskutuar situatën në Ukrainë dhe centralin bërthamor të Zaporizhias të pushtuar nga Rusia. Rusia e kapi centralin bërthamor menjëherë pas pushtimit të Ukrainës në shkurt 2022.
“Është e rëndësishme që në kuadër të përmbushjes së detyrimeve të mia të ruaj kanale të vazhdueshme komunikimi”, tha Grossi në një konferencë për media.
Javën e kaluar, IAEA tha në një deklaratë se Grossi do të vizitonte Kievin për takime të nivelit të lartë për të garantuar sigurinë bërthamore në luftën që Rusia filloi në shkurt 2022. Në shtator, Ukraina dhe IAEA ranë dakord që ekspertë nga organizata ndërkombëtare do të monitoronin situatën në nënstacionet kryesore të Ukrainës, si dhe në termocentralet bërthamore.
Më shumë se 50% e energjisë elektrike të konsumuar në Ukrainë prodhohet nga tre termocentrale bërthamore. Sulmet ruse me raketa dhe dron në nënstacione kërcënojnë funksionimin e qëndrueshëm të termocentraleve bërthamore, sipas inspektoratit bërthamor të Ukrainës.
Nënstacioni Kyivska lejon transferimin e kapaciteteve të tepërta nga Ukraina perëndimore në rajonet qendrore falë linjës së transmetimit Rivne-Kiev, e cila shtrihet për qindra kilometra, duke ndihmuar në sigurimin e energjisë elektrike për Kievin dhe zonën përreth.
