Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
BOTA
Analiza: Pse kanë frikë minoritetet e Austrisë nga një kancelar si Herbert Kickl?
n.fPërditësimi i fundit 16 Janar 2025, 13:21
Kickl
AUSTRI- Negociatat e koalicionit midis FPÖ dhe ÖVP po përparojnë në Austri. Për liderin e FPÖ-së Kickl, kancelaria është e arritshme. Kjo po shkakton frikë tek shumë njerëz. Temperaturat lëvizin rreth pikës së ngrirjes, ndërsa mijëra njerëz mblidhen para Kancelarisë Federale në Vjenë. Një grua e re me piercing qëndron pranë një burri të moshuar të veshur elegant me një kapele, pas tij një baba me një fëmijë të vogël mbi supe.
Të gjitha grupmoshat janë të përfaqësuara dhe askush nuk sprapset nga moti i ftohtë. Ka fishkëllima, brohoritje dhe thirrje mosaprovimi. Njerëzit janë të bashkuar nga zemërim për kolapsin e bisedimeve të koalicionit midis partive centriste javën e kaluar dhe nga frika nga një kancelar Herbert Kickl.
Njëri prej tyre është Alon Ishay. Ky student i shkencave kompjuterike është president i Bashkimit të Studentëve Hebrenj. Për të, fakti që mandati për të formuar një qeveri në Austri i është dhënë tani një partie të mbushur me vëllazëri të krahut të djathtë dhe e cila nuk ka hequr dorë kurrë në mënyrë të besueshme nga ideologjia naziste është një kërcënim i qartë për hebrenjtë e Austrisë:
"Me mandatin për të formuar një qeveri, që i është dhënë FPÖ-së dhe Herbert Kicklit, ne jemi përballur me qeverinë e ekstremit më të djathtë që ka ekzistuar në Austriqë nga viti 1945. FPÖ thotë se ka dëshirë të heqë shtetësi dhe për të dëbuar njerëzit. Herën e fundit kjo Ka ndodhur 80-90 vjet më parë dhe ne e kemi të qartë: nuk duam të kthehemi kurrë atje”.
"Kjo nuk është më Austria ime"
Por nuk është vetëm komuniteti hebre i Austrisë që shqetësohet për ardhjen si kancelar të Kicklit. Klima në vend gjithashtu mund të bëhet shumë më e ashpër për njerëzit që e konsiderojnë veten pakicë. Një grua e re me ngjyrë është mbështjellë fort me një flamur të BE. Ajo ka frikë se mund të margjinalizohet, thotë ajo, dhe preferon të mbetet anonime.
Frika se mund ta deportojnë e pushton gjithmonë kur mendon për konceptin e Kickl-it për riemigrimin, dëbimin masiv të njerëzve me prejardhje migrante: Në fund të fundit, Kickli kohët e fundit ka thënë: "Unë nuk e di se çfarë të keqe mund të ketë te reemigrimi" , thotë ajo dhe shton se "kjo nuk është më Austria ime".
Procedurat e heqjes së azilit tashmë po zhvillohen
Siriani Abdulhkeem Alshater, 44 vjeç, nga Homs, ka një mendim të ngjashëm. Pasi u përfshi në rezistencën kundër regjimit të Asadit, ai u detyrua të arratisej në vitin 2015 dhe mbërriti në Vjenë, ku themeloi organizatën laike Komuniteti i Lirë Sirian.
Ai ka përjetuar gjithçka që mund të imagjinohet, thotë, një kthesë djathtas në Austri nuk mund ta trembë personalisht. Frikë ai ka për të bijën, e cila më pas duhet të vuajë nga më shumë racizëm dhe diskriminim.
Procedurat e heqjes së azilit për sirianët kanë filluar në Austri që nga fillimi i dhjetorit, të zbatuara që nën qeverinë e mëparshme të udhëhequr nga ÖVP konservatore. Alshater merr qindra telefonata çdo ditë nga njerëz që nuk janë në gjendje të flenë ose të hanë. Komuniteti sirian është në një situatë të pasigurisë të plotë, e cila ndoshta do të përkeqësohet nën një qeveri FPÖ-ÖVP.
Planet afatgjata të Kicklit
Planet e tjera të FPÖ-së së Kicklit përfshijnë përfundimin e sanksioneve kundër Rusisë, reduktimin e radiotelevizionit publik, ndalimin e "islamit politik" dhe "të çmendurive me gjininë dhe diversitetin".
Gjatë fushatës zgjedhore, Kickli vazhdimisht e bëri të qartë se ai e sheh Austrinë si në mes të një lufte kulturore. Në çadrat e birrës, nxitja kundër komunitetit LGBTIQ dhe flamujve të tyre me ylber ishte gjithmonë diçka që presidenti i FPÖ mund ta përdorte për të siguruar të qeshura dhe miratim.
A po humbasin të drejtat homoseksualët?
Ann-Sophie Otte shpesh shfaqet me simbolin e ylberit. Ajo është presidente e shoqatës austriake të lezbikeve dhe homoseksualëve dhe, si shumë prej anëtarëve të saj, është e shqetësuar.
Që nga korona, shoqëria gjithsesi ka dalë nga frerët, krimet e urrejtjes ndaj homoseksualëve ose lezbikeve janë shtuar, si pështyrja e tyre në rrugë ose fyerjet më pas. Ekziston gjithashtu një frikë e vërtetë se njerëzit queer do të humbasin të drejtat nën një qeveri FPÖ-ÖVP.
Ka shqetësime serioze se qasja në trajtimin e përshtatshëm mjekësor për njerëzit transgjinorë do të përkeqësohet dhe se e ashtuquajtura terapi e konvertimit, e cilësuar shpesh si "kura për homoseksualët", po mbështetet sërish nga shumica - skenar horror për Otte.
Përparim në bisedimet FPÖ-ÖVP
Megjithatë, FPÖ dhe ÖVP kanë përparuar në marrëveshjet e tyre të koalicionit dhe kanë rënë dakord për masat për konsolidimin buxhetor, një nga çështjet për të cilat dështuan negociatat e koalicionit mes partive të qendrës. Duket se nuk ka pengesa të mëdha në rrugën e pushtetit për njeriun që dëshiron të bëhet "Kancelar i Popullit" - një term ky i përdorur nga Hitleri./DW
