Në ditën e nisjes së gjyqit të themelit për dosjen “Partizani”, ish-kryeministri Sali Berisha ka mohuar akuzat e ngritura...
BOTA
Bundestagu gjerman pranon mocionet për ashpërsimin e ligjit për azilin
M.B.Përditësimi i fundit 29 Janar 2025, 22:33
GJERMANIA- Në një atmosferë të ndezur parlamenti gjerman debatoi për rrugën e duhur në politikën për azilin dhe migracionin. Debati u nxit nga drejtuesi konservator i opozitës, kryetari i partisë CDU, Friedrich Merz, i cili ka shanse të mira për t'u bërë kancelar i ri pas zgjedhjeve të Bundestagut më 23 shkurt. Grupi i tij parlamentar, i përbërë nga CDU dhe partia e saj simotër bavareze, CSU, kishte paraqitur dy mocione në Bundestag, në të cilët kërkohet një ashpërsim i konsiderueshëm i politikës së imigracionit. Nga 703 deputetët e pranishëm në votim për mocionin e parë votuan pro 348 deputetë, 345 kundër dhe 10 abstenuan.
Kontrolle të vazhdueshme dhe refuzim në kufi
Në mocionin e parë kërkoheshin ndër të tjera, kontrolle të vazhdueshme kufitare me të gjitha vendet fqinje dhe ndalimin për të hyrë në Gjermani të të gjithë atyre personave që nuk kanë dokumente të vlefshme hyrjeje, edhe nëse ata kërkojnë azil. Po ashtu personat që janë të detyruar të largohen nga Gjermani duhet të arrestohen dhe nga Gjermani duhet të dëbohen për ditë të huajt që nuk kanë leje qëndrimi.
Mocioni për sigurinë e brendshme nuk gjen mbështetje
Me mocionin e dytë CDU/CSU synonte një "ndryshim në politikën e sigurisë së brendshme". Megjithatë asnjëri nga mocionet nuk ka veprim detyrues për qeverinë gjermane. Ndryshe qëndron puna me kërkesën për ashpërsimin e ligjit për emigracionin, për të cilin Bundestagu do të votojë me propozimin e partive CDU dhe CSU të premten.
Ky projektligj parashikon ndër të tjera kufizimin e emigracionit në Gjermani dhe ndalimin e bashkimit familjar për personat që gëzojnë të ashtuquajturën të drejtë për mbrojtje shtesë. Fjala është për persona që jetojnë në Gjermani, të cilëve nuk u është dhënë azil, por që për momentin lejohen të qëndrojnë në Gjermani për arsye të tjera.
Për këtë projektligj kanë deklaruar se do të votojnë me 'po' partitë AfD, FDP dhe madje edhe BSW. Por që të miratohet përfundimisht ky lidh duhet të kalojë edhe përmes Këshillit Federal, Bundesrat, organi ku përfaqësohen 16 landet federale. Nëse Bundesrat-i do ta miratojë këtë ligj është më se e hapur. Sidoqoftë Këshilli Federal mund të merret me këtë çështje vetëm pas zgjedhjeve të reja parlamentare më 23 shkurt./ DW
