Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
BOTA
Dhomën e Përfaqësuesve në SHBA miraton paketën fiskale dhe migratore të Presidentiti/ Trump: Pjesa më e rëndësishme e legjislacionit e kaluar ndonjëherë!
E.DPërditësimi i fundit 22 Maj 2025, 18:53
SHBA- Me 215 vota pro dhe 214 kundër, Republikanët në Dhomën e Përfaqësuesve miratuan paketën voluminoze fiskale dhe migratore të Donald Trump, e cila mban zyrtarisht titullin “Një Ligj i Madh dhe i Bukur” (“One Big Beautiful Bill”). Projektligji që tani kalon në Senat, kombinon premtime elektorale me masa që sipas udhëheqjes së Partisë Republikane synojnë të rishkruajnë modelin e shtetit dhe ekonomisë së Shteteve të Bashkuara.
Sipas Washington Post, analiza e Zyrës së Buxhetit të Kongresit (CBO), një institucion i pavarur fiskal, tregon se projektligji do të shtojë edhe 2.4 trilionë dollarë në borxhin publik gjatë 10 viteve të ardhshme një borxh që tashmë ka kaluar 36 trilionë dollarë. Megjithëse përfshin shkurtime prej 1 trilion dollarësh në programe sociale, parashikimet tregojnë se ato nuk mjaftojnë për të mbuluar koston e përgjithshme.
Ndërkohë, me një postim entuziast në rrjetin e tij Truth Social, Trump përshëndeti miratimin nga Dhoma e Përfaqësuesve të një ligji të madh dhe të bukur, të cilin e cilësoi si ndoshta pjesën më të rëndësishme të legjislacionit që është miratuar ndonjëherë në historinë e Shteteve të Bashkuara.
Paketa përfshin: ulje të mëdha të taksave, përjashtim të plotë nga taksat për bakshishet dhe orët shtesë, lehtësime fiskale për blerjen e makinave amerikane, masa të rrepta për sigurinë kufitare, rritje pagash për punonjësit e Rojeve Kufitare, financim për projektin “Kupola e Artë” (Golden Dome).
Trump falënderoi kryetarin e Dhomës, Mike Johnson, duke e quajtur ligjin historik dhe u bëri thirrje senatorëve që ta miratojnë sa më shpejt që të jetë e mundur, duke shtuar: “Nuk ka asnjë minutë për të humbur”.
Në të njëjtin postim, Trump sulmoi ashpër Demokratët, duke i akuzuar se kanë humbur çdo kontroll dhe enden pa drejtim. Ai tha se ata kanë harruar shkatërrimin e tyre zgjedhor dhe se po përpiqen të rikthejnë politikat e kufijve të hapur dhe të lejojnë burrat të marrin pjesë në sportet e femrave. Ai përfundoi duke thënë: “Asgjë nga këto nuk do të ndodhë më kurrë.”
