Drejtori i Përgjithshëm i Policisë së Shtetit, Skënder Hita ka mbërritur në Drejtorinë e Policisë së Kor&cce...
BOTA
Draftraporti në Asamblenë e NATO-s: Zyrtarë të KFOR-it negociuan për tërheqjen e sulmuesve në Banjskë
r.llPërditësimi i fundit 26 Maj 2024, 08:53
foto ilustruese
BULLGARI- Mark Lancaster, raportues në Asamblenë Parlamentare të NATO-s, në draftraportin që e prezantoi sot në sesion pranveror të këtij mekanizmi në Sofje, ka përfshirë një raport në të cilin thuhet se zyrtarë të KFOR-it patën negociuar për tërheqjen e një pjese të grupit të sulmuesve të armatosur serbë në Banjskë.
Draftraporti “Ballkani Perëndimor: Sfidat e reja të sigurisë në pragun e NATO-s”, përfshin edhe të dhëna nga raporti i Grupit Ndërkombëtar të Krizës (2 prill), e në të cilin jepen hollësi për sulmin e fundshtatorit të 2023-s.
“Pas një periudhe të shkurtër të depërshkallëzimit gjatë verës, në shtator të 2023-s, rreth 30 burra të armatosur u përplasën me policinë në Banjskë në veri të Kosovës dhe u barrikaduan brenda manastirit ortodoks serb, në atë që rezultoi me një rrethim që la të vrarë një zyrtar policor dhe tre sulmues. Zyrtarë të KFOR-it negociuan tërheqjen e pjesës së mbetur të grupit në malet përreth, nëpërmjet të cilave ata u zhdukën. Autoritetet e Kosovës besojnë se potencialisht qindra luftëtarë të tjerë po fshiheshin në malet mes Banjskës dhe kufirit me Serbinë si dhe se kanë zbuluar arsenal të madh të armëve, me kapacitet për të shkaktuar dëm dhe viktima të konsiderueshme – duke përfshirë lansues raketash anti-tank, lansues mortajash dhe granatash, mina anti-tank dhe 24 automjete (një e blinduar)”, thuhet në draftraportin e prezantuar.
Ky draftraport u prezantua në ditën e dytë të punimeve të Asamblesë Parlamentare të NATO-s, në agjendë të së cilës është çështja e avancimit të statusit të Kosovës nga vëzhgues, në anëtar të asociuar. Normalizimi i marrëdhënieve mes Kosovës e Serbisë, sfidat e sigurisë dhe kërcënimi për konflikt janë çështjet tjera të përmendura në këtë draftraport.
Në kuadër të këtij sesioni, Kosova pret që të hënën të ketë votim të suksesshëm për avancimin e statusit të saj nga vëzhgues, në anëtar të asociuar të Asamblesë Parlamentare. Lordi Mark Lancaster, përfaqësues nga Mbretëria e Bashkuar, ka kërkuar që aleatët të konsultohen lidhur me statusin e Kosovës në këtë mekanizëm.
“Aleatët duhet të përdorin korniza konsultative për të avancuar çështjen lidhur me statusin e Kosovës. Ata që nuk e njohin statusin e Kosovës, mund të mendojnë pjesëmarrjen e Kosovës në NATO dhe në partneritetin për paqe”, ka thënë Lancaster.
Një ditë më parë, kryesuesi i delegacionit kosovar në Asamblenë Parlamentare të NATO-s, Driton Hyseni, pati shprehur pritjen për votim të suksesshëm për avancimin e statusit të Kosovës në këtë mekanizëm. Por kryetarja e Parlamentit të Serbisë, Ana Bërnabiq, ka nisur fushatë për ta penguar këtë, duke i dërguar letër kryesuesit të delegacionit të Kroacisë, në të cilën theksoi se avancimi i statusit të Kosovës do të kishte pasoja negative politike dhe të sigurisë.
Asambleja Parlamentare e NATO-s është institucionalisht e ndarë nga NATO-ja, por shërben si një lidhje e rëndësishme mes NATO-s dhe parlamenteve të vendeve anëtare. Ajo përbëhet nga 281 delegatë nga të 32 vendet anëtare të NATO-s. Përveç tyre, në aktivitete të saj marrin pjesë edhe delegatë nga 9 vende të asociuara, 4 vende të asociuara mesdhetare, si dhe 8 delegacione vëzhguese parlamentare.
