Kreu i degës së Partisë Demokratike në Krujë, Aulon Kalaja, ka denoncuar publikisht presione të dyshuara të policisë n...
BOTA
DW: Evropianët propozojnë rritjen e pranisë së NATO-s në Groenlandë, por Trump i ka të qarta qëllimet e tij
PiranjatPërditësimi i fundit 13 Janar 2026, 08:26
Kërcënimet e Trump kundër Groenlandës po shkaktojnë prej ditësh tensione. Tani evropianët propozuan rritjen e pranisë së NATO-s në Arktik. Por Trumpi po e bën veshin të shurdhër.
Në sfondin e pretendimit të SHBA-së ndaj Groenlandës vendet evropiane po përpiqen t’i mbështesin politikisht Danimarkën dhe Groenlandë. Pas një deklarate të përbashkët të nënshkruar nga disa vende evropiane, në të cilën theksohet se “Groenlanda i përket popullit të saj” dhe theksohet se SHBA është një “partner i rëndësishëm” për sigurinë në Arktik, Gjermania, Britania e Madhe dhe një sërë shtetesh evropiane anëtare të NATO-s u shprehën për zgjerimin e pranisë së aleancës në Arktik.
Sipas diplomatëve fjala është për idenë e krijimit të një misioni mbikëqyrës të quajtur “Arctic Sentry” (Rojet e Arktikut). Me këtë ide vendet evropiane synojnë të shfuqizojnë argumentin e amerikanëve se në këtë rajon strategjikisht të rëndësishëm siguria nuk mund të garantohet në mënyrë të mjaftueshme.
Pjesë e rëndësishme e territorit të NATO-s Sekretari i Përgjithshëm i NATO-s,Mark Rutte, tha se të gjithë aleatët e NATO-s janë të një mendjeje për rëndësinë e Arktikut dhe të sigurisë së Arktikut. Rajoni është një “pjesë e rëndësishme” e territorit të NATO-s dhe ekziston rreziku që Rusia dhe Kina të bëhen “më aktive” atje në të ardhmen. “Aktualisht po punojmë për hapat e ardhshëm për të siguruar mbrojtjen e përbashkët ndaj këtij rreziku.” Aleanca, tha ai, nuk kishte qenë “aq shumë” e përfshirë në Arktik në të kaluarën, por me kërkesë të vendeve nordike, anëtare të NATO-s, ajo e ka ndryshuar vitin e kaluar këtë qëndrim.
Edhe Ministri i Jashtëm gjerman, Johann Wadephul, deklaroi pas takimit në Uashington me homologun e tij Marco Rubio se çështja e sigurisë në Atlantikun e Veriut duhet të zgjidhet brenda kornizës së NATO-s.
Trump nuk i bëjnë përshtypje deklaratat e evropianëve Duket se këto propozime kanë rënë në vesh të shurdhër tek Presidenti i SHBA-së Trump lidhur me pretendimin e tij për Groenlandën. Një gazetar e pyeti Trumpin në bordin e Air Force One, nëse fakti që Britania e Madhe dhe Gjermania po diskutojnë aktualisht plane për rritjen e sigurisë në Arktik brenda kornizës së NATO-s, ndryshon ndonjë gjë në përfytyrimet e tij. Dhe Trumpi tha se ato nuk e ndryshojnë vlerësimin e tij. “Ne flasim për blerje, jo për marrje me qira,” theksoi ai.
Trumpi e bëri të qartë se qëllimi i tij është ta zotërojë Groenlandënpër një periudhë afatgjatë. Ai e justifikoi këtë edhe një herë duke pretenduar se përndryshe Kina ose Rusia do ta aneksonin ishullin. “Nëse nuk e marrim Groenlandën, Rusia ose Kina do ta bëjnë këtë, dhe unë nuk do ta lejoj që kjo të ndodhë,” tha presidenti i SHBA-së./DW
