Pasuri me vlerë 77 milionë lekë janë vendosur nën sekuestro preventive në kuadër të hetimit të SPAK për traf...
BOTA
E pazakontë/ Babai i vendos kamerë sigurie në kokë vajzës për ta monitoruar kudo që shkon
PiranjatPërditësimi i fundit 16 Qershor 2026, 12:02
Një baba nga Pakistani ka tërhequr vëmendjen në rrjetet sociale pasi dyshohet se i ka vendosur vajzës së tij një kamerë sigurie në kokë, në mënyrë që ta monitorojë vazhdimisht dhe të sigurohet që ajo është e sigurt.
Rasti u bë viral në platformën X, ku një video e titulluar “Siguria e Nivelit Tjetër” tregon një grua të re duke dhënë një intervistë ndërsa mban mbi kokë, mbi burkën e saj, një kamerë të ngjashme me ato të sistemit CCTV.
E pyetur për aksesorin e pazakontë, ajo shpjegoi se ideja kishte qenë e babait të saj dhe se nuk kishte kundërshtuar, pasi e kuptonte shqetësimin e prindërve për sigurinë e saj.
Sipas saj, vendimi erdhi pas një ngjarjeje tragjike në qytetin e Karaçit, ku një vajzë e re humbi jetën në rrethana të dhunshme. Pas këtij rasti, babai i saj, të cilin ajo e quajti me humor “roja ime personale e sigurisë”, i propozoi të mbante kamerën sa herë dilte nga shtëpia, në mënyrë që ai të mund të ndiqte lëvizjet e saj.
Megjithëse ideja është konsideruar e çuditshme dhe ka shkaktuar reagime të shumta në internet, e reja këmbënguli se kërcënimet ndaj grave në Karaçi janë reale dhe se familja e saj kishte arsye të forta për t’u shqetësuar.
Megjithatë, përdoruesit e rrjeteve sociale ngritën pikëpyetje mbi efektivitetin e kësaj mase. Shumë prej tyre vunë në dukje se një kamerë e vendosur në pjesën e përparme të kokës nuk do të ishte shumë e dobishme në rast se dikush do ta sulmonte nga pas.
Të tjerë spekuluan se familja mund të jetë mbështetur te fakti që vetë prania e dukshme e një kamere sigurie mund të shërbejë si faktor frenues për personat me qëllime të këqija./Përktheu Piranjat News
