Kreu i degës së Partisë Demokratike në Krujë, Aulon Kalaja, ka denoncuar publikisht presione të dyshuara të policisë n...
BOTA
E pazakontë/ Fermeri spërkat makinat e turistëve me pleh organik: Jam lodhur nga abuzimet e tyre
PiranjatPërditësimi i fundit 29 Maj 2026, 12:10
Një fermer i revoltuar në zonën e njohur turistike të Lake District, në Cumbria të Anglisë, ka spërkatur me pleh organik dhjetëra automjete të parkuara në mënyrë të paligjshme në tokën e tij, duke deklaruar se ishte “lodhur nga sjellja e turistëve”. Hogg Hodgson ndërmori këtë veprim pasi shumë drejtues mjetesh shpërfillën tabelat paralajmëruese dhe parkonin automjetet në fushën e tij me dele gjatë fundjavës së pushimeve.
Në hyrje të pronës ishin vendosur disa tabela me mbishkrimet “Mos parkoni” dhe “Ka dele në fushë”, por kjo nuk i ndaloi turistët që të linin aty makinat e tyre, përfshirë mjete luksoze si Mercedes, BMW dhe Jaguar.
Pamjet e publikuara në rrjetet sociale tregojnë automjetet të mbuluara me njolla kafe nga plehu organik, duke shkaktuar debat të madh mes komentuesve. Megjithatë, fermeri mbrojti veprimin e tij, duke thënë se nuk e bëri nga krenaria apo hakmarrja, por nga zhgënjimi i vazhdueshëm për mënyrën se si turistët trajtojnë zonën dhe pronat private.
Sipas tij, kjo nuk është hera e parë që përballet me probleme të tilla. Ai pretendon se turistët shpesh hedhin mbeturina, dëmtojnë gardhet dhe hyjnë pa leje në tokën e tij pranë liqenit Rydal Water.
Shumë banorë vendas dhe përdorues të rrjeteve sociale kanë mbështetur fermerin, duke argumentuar se drejtuesit e mjeteve kishin injoruar qëllimisht sinjalistikën dhe kishin hyrë në pronë private. Të tjerë, ndërkohë, e kanë konsideruar të tepruar reagimin e tij. Policia e Cumbria-s ka konfirmuar se është në dijeni të ngjarjes dhe ka nisur verifikimet për të sqaruar plotësisht rrethanat e incidentit./Përktheu Piranjat News
