"Ekziston një urrejtje e jashtëzakonshme mes Putin dhe Zelenskyy"/ Trump: Marrëveshja Rusi-Ukrainë ndoshta nuk do arrihet!

SHBA- Presidenti i SHBA-së, Donald Trump, ka pranuar se arritja e një marrëveshjeje paqeje midis Ukrainës dhe Rusisë mund të jetë e paarritshme për shkak të urrejtjes së thellë midis dy palëve. Trump tha gjithashtu se kishte momente kur ai ishte afër largimit nga një rol ndërmjetësues. Megjithatë, ai konfirmoi se largimi është ende një mundësi. 

“Ndoshta nuk është e mundur. Ekziston një urrejtje e jashtëzakonshme. Ata kanë luftuar fort për 3 vjet”, tha Trump duke shpejguar po flasin për një urrejtje të jashtëzakonshme midis Volodymyr Zelenskyy dhe Vladimir Putin. 

Gjithashtu New York Times shkruan se Kievi do të marrë më shumë ndihma kundër pushtimit rus. Po ashtu bëhet fjalë për një sistem mbrojtës ajror “Patriot” që ka qenë i vendosur më parë në Izrael dhe që do të dërgohet në Ukrainë pasi të rinovohet.

Gazeta ka cituar 4 zyrtarë aktualë dhe ish-zyrtarë amerikanë, duke shtuar se aleatët perëndimorë po diskutojnë logjistikën e një transferimi të mundshëm të një sistemi tjetër “Patriot” nga Gjermania ose Greqia. Ndërsa në krahun tjetër Putin thotë se ka forca të mjaftueshme për të fituar pa përdorur armët bërthamore.

“Ne kemi forca dhe burime të mjaftueshme për ta çuar atë që filloi në vitin 2022 në një përfundim logjik, me rezultatin që i nevojitet Rusisë, edhe pa përdorur armë bërthamore në Ukrainë. Mendoj se është e pashmangshme. Pavarësisht gjithë tragjedisë që po përjetojmë. Është çështje kohe," tha Putin në një intervistë në televizionin “Rossiya1 TV”.