Florjan Binaj ka folur për angazhimin e tij politik dhe mundësinë e kandidimit në zgjedhjet e ardhshme.
I pyetur nëse, do të jet&...
BOTA
Europa përvëlohet nga i nxehti/ Qytetet hapin “strehat e ftohta” dhe masa emergjente
PiranjatPërditësimi i fundit 23 Qershor 2026, 22:48
Evropa po përballet me një valë ekstreme të të nxehtit, me temperatura që pritet të thyejnë rekorde në ditët në vijim dhe që në disa zona po i afrohen deri në 40–45°C. Qytetet e ndryshme në kontinent kanë nisur të marrin masa emergjente për të mbrojtur qytetarët nga temperaturat përvëluese të muajit qershor.
Holandë Në Amsterdam është ngritur një rrjet “pikash ftohjeje” në të gjithë qytetin, të vendosura në biblioteka, teatro, kisha, ferma, qendra komunitare dhe supermarkete. Këto hapësira ofrojnë ujë të pijshëm, vende pushimi dhe shërbime bazike, ndërsa janë të aksesueshme edhe për kafshët shtëpiake.
Shkollat po përshtatin oraret me të ashtuquajturat “orarë tropikalë”, duke shkurtuar mësimin, shtuar pushimet dhe përmirësuar ventilimin. Çdo institucion vendos vetë masat, pasi nuk ka një kufi të përcaktuar ligjor për temperaturën në klasa.
Francë Në Paris, disa bashki po ofrojnë bileta falas për kinema për të rinjtë dhe të moshuarit, në bashkëpunim me salla të pajisura me ajër të kondicionuar. Ndërkohë, muze dhe biblioteka po promovohen si “strehë kundër vapës”, ndërsa në disa qytete hyrja në muze është bërë falas përkohësisht.
Në disa zona është rritur kërkesa për një pluhur të bardhë të quajtur “Blanc de Meudon”, i përdorur për lyerjen e xhamave për të ulur depërtimin e rrezeve të diellit dhe temperaturën e brendshme.
Spanjë Në Aragon, qytetet Zaragoza dhe Huesca kanë ulur çmimet e pishinave publike, ndërsa në Logroño hyrja është bërë falas gjatë valës së të nxehtit. Shatërvanët dekorativë qëndrojnë të ndezur deri në orët e vona, ndërsa në disa zona janë aktivizuar spërkatës uji për qytetarët.
Autoritetet kanë pezulluar gjithashtu disa evente tradicionale dhe fishekzjarre për shkak të rrezikut të zjarreve, ndërsa janë krijuar “strehë kundër vapës” në ndërtesa publike me ajër të kondicionuar.
Itali Edhe Italia po përjeton temperatura të pazakonta për qershorin. Qeveria ka rikthyer masat mbrojtëse për punëtorët që ekspozohen ndaj vapës, duke lejuar pezullimin ose reduktimin e punës në orët më të nxehta.
Në qytete si Palermo, Torino dhe Roma, janë shtuar masat si ventilatorë gjigantë, spërkatës uji dhe kufizime në shërbime të jashtme. Autoritetet këshillojnë konsum më të lehtë ushqimesh dhe hidratim të vazhdueshëm.
Belgjikë dhe Gjermani Në Belgjikë pritet një valë e re e të nxehtit me temperatura që mund të afrohen deri në 40°C, ndërsa në Gjermani parashikohen rekorde për muajin qershor. Disa kompani kanë përshtatur edhe uniformat e punonjësve, duke lejuar veshje më të lehta për të përballuar kushtet ekstreme.
