Një prej protestuesve të mbledhur para zyrave të EULEX-it në Fushë-Kosovë ka reaguar me lot në sy pas vendimit të Gjyk...
BOTA
Çfarë thonë faktet?/ Rihapet gjyqi për vdekjen e Diego Maradonës
PiranjatPërditësimi i fundit 15 Prill 2026, 12:45
Eshtë rihapur sërish gjyqi për vdekjen e legjendës së futbollit Diego Maradona e cila nisi një vit pasi çështja e parë dështoi dhe u shpall e pavlefshme.
Shtatë anëtarë të ekipit të tij mjekësor akuzohen për vrasje nga pakujdesia pasi ai vdiq nga një atak në zemër në moshën 60-vjeçare. Ata i kanë mohuar akuzat. Nëse shpallen fajtorë, përballen me dënime nga tetë deri në 25 vjet burg.
Gjyqi i parë u ndërpre majin e kaluar kur një nga tre gjyqtarët dha dorëheqjen, pasi dyshohet se lejoi xhirime të paautorizuara në sallën e gjyqit për një dokumentar.
Maradona vdiq në vitin 2020 në shtëpinë e tij në Tigre, në provincën Buenos Aires, ndërsa po rikuperohej nga një operacion për heqjen e një mpiksjeje gjaku në tru.
Hetuesit e klasifikuan rastin si vrasje nga pakujdesia (e ngjashme me vrasjen e pavullnetshme), pasi thanë se të akuzuarit ishin të vetëdijshëm për gjendjen e rëndë shëndetësore të Maradonës, por nuk morën masat e nevojshme për ta shpëtuar.
Dështimi i zemrës i shkaktoi atij edemë pulmonare akute, një gjendje ku lëngu grumbullohet në mushkëri, sipas autopsisë paraprake.
Një panel ekspertësh mjekësorë, i angazhuar nga prokurorët për të hetuar ekipin mjekësor të Maradonës, tha se trajtimi që ai mori në shtëpi ishte “i mangët dhe i pakujdesshëm”.
Ata përfunduan se futbollisti “do të kishte pasur më shumë mundësi për të mbijetuar” nëse do të kishte marrë trajtim të duhur në një institucion të përshtatshëm mjekësor.
Mes shtatë të pandehurve janë mjeku i tij kryesor, Leopoldo Luque, dhe psikiatrja Agustina Cosachov. Infermierja e tij e mëparshme, Dahiana Gisela Madrid, do të gjykohet në një proces të veçantë. Rreth 100 persona pritet të dëshmojnë para një trupi të ri gjyqtarësh në një gjykatë në San Isidro, përfshirë edhe vajzat e Maradonës. Gjyqi pritet të zgjasë deri në korrik.
Kur futbollisti vdiq më 25 nëntor 2020, presidenti i atëhershëm i Argjentinës, Alberto Fernández, shpalli tre ditë zie kombëtare.
“Faleminderit që ekzistove, Diego. Do të na mungosh gjithë jetën,” tha ai.
Maradona e nisi karrierën te Argentinos Juniors. Ai përfaqësoi Argjentinën në katër Kupa Bote, duke shënuar 34 gola, përfshirë golin famëkeq “Dora e Zotit” kundër Anglisë në vitin 1986.
Në pjesën e dytë të karrierës së tij, ai pati probleme me varësinë nga kokaina. Në vitin 1991, u pezullua për 15 muaj pasi rezultoi pozitiv për këtë substancë.
Ai u tërhoq nga futbolli profesionist në vitin 1997, në ditëlindjen e tij të 37-të, gjatë periudhës së dytë te klubi argjentinas Boca Juniors. Në vitin 2008, u emërua trajner i kombëtares së Argjentinës dhe u largua pas Kupës së Botës 2010, ku skuadra e tij u eliminua nga Gjermania në çerekfinale.
Më pas drejtoi skuadra në Emiratet e Bashkuara Arabe dhe në Meksikë dhe ishte trajner i klubit argjentinas Gimnasia y Esgrima në momentin e vdekjes së tij./Përktheu Piranjat News
