Shqipëria ka arritur rekord për punësimin e shtetasve të huaj që arrijnë mbi 22 mijë shtetas deri në qershor 2026 nga 18...
BOTA
Gjendja shëndetësore e Papa Françeskut/ Spitali ku ndodhet Ati i Shenjtë: Vijon të paraqitet një tablo e ndërlikuar
M.B.Përditësimi i fundit 19 Shkurt 2025, 08:13
ITALIA- Papa Françesku, i cili ndodhet i shtruar në spitalin 'Gemelli' që nga e premtja e kaluar, vuan nga "pneumonia bilaterale" dhe gjëndja e tij klinike paraqitet e ndërlikuar. Buletini i spitalit 'Gemelli' publikuar në pasditen e djeshme tregon se situata e Papa Françeskut, është më delikate se kurrë.
"Analizat laboratorike, radiografia e kraharorit dhe gjendja klinike e Atit të Shenjtë vazhdojnë të paraqesin një tablo të ndërlikuar," thuhet në deklaratë.
Papa kishte dy javë që nuk ndihej mirë dhe u shtrua në spital të premten për një "infeksion të rrugëve të frymëmarrjes". Analizat e kryera deri të hënën kishin zbuluar një "infeksion polimikrobial", pra praninë e baktereve dhe mikroorganizmave të ndryshëm në rrugët e frymëmarrjes.
Tani shpjegohet se ky "infeksion polimikrobial" është "shfaqur në një situatë me bronkiektazi" dhe "bronkit astmatiform", i cili shkakton vështirësi në frymëmarrje dhe gulçim, simptoma që Papa i shfaqte edhe para shtrimit në spital. E gjithë kjo, thuhet në buletin, "ka kërkuar përdorimin e një terapie kortizonike dhe antibiotike, duke e bërë trajtimin më kompleks".
Nga spitali 'Gemelli' bëhet e ditur se, pavarësisht gjithçkaje, Papa është me humor të mirë. Dita ka kaluar si zakonisht, ai ka marrë eukaristinë dhe ka alternuar pushimin me lutjen dhe leximin e librave. Sipas mediave italiane, gjatë gjithë ditës, nga Selia e Shenjtë kanë ardhur mesazhe qetësuese, aq sa e lejonte situata.
