Ish-zëvendëskryeministres Belinda Balluku iu komunikua sot shtyrja e hetimeve nga ana e SPAK deri më janar të vitit 2027. Siç shihe...
BOTA
Gjykatësi amerikan thotë se Google ka krijuar monopol të paligjshëm
S.BPërditësimi i fundit 6 Gusht 2024, 14:47
Google
SHBA- Një gjykatës amerikan vendosi se kompania Google ka shkelur ligjin, pasi ka shpenzuar miliarda dollarë për të krijuar një monopol të paligjshëm dhe është bërë motori kryesor i kërkimeve në botë.
Kjo është fitorja e parë e madhe e autoriteteve federale kundër dominimit të tregut nga kompanitë e mëdha të teknologjisë.
Vendimi i hap rrugën mbajtjes së gjykimit të dytë për të përcaktuar për mënyrat se si mund të përmirësohet kjo çështje, përfshirë ndarjen e Alphabet nga Google, që do të ndryshonte peizazhin në botën e reklamimit online, që Google e ka dominuar për vite të tëra.
Vendimi i gjykatësit, Amit Mehta, po ashtu i jep dritën e gjelbër zbatimit më të fuqishëm të ligjit nga SHBA-ja kundër kompanive të mëdha të teknologjisë.
“Gjykata ka ardhur në këtë përfundim: Google është monopolist, ka vepruar si një për të mbajtur monopolin”, tha Mehta në vendim.
Në vendimin e gjykatësit të qarkut në Uashington u tha se Google kontrollon rreth 90 për qind të tregut të kërkimeve online dhe 95 për qind të kërkimeve që bëhen përmes telefonave të mençur.
Faza e “zgjidhjes” mund të jetë e gjatë, pasi ka mundësi që të dërgohen apele në Gjykatën e Apelit në qakun e Kolombias, por edhe në Gjykatën Supreme. Ky proces ligjor mund të zgjasë gjithë vitin e ardhshëm, e madje edhe në vitin 2026.
Aksionet në Alphabet ranë për 4.5 për qind të hënën, pas rënies së aksioneve të shumë kompanive të teknologjisë. Reklamimi i kompanisë Google në Alhpabet përbënte 77 për qind të shitjeve të përgjithshme në vitin 2023.
Alphabet tha se planifikon të apelojë vendimin e gjykatësit Mehta.
“Ky vendim thotë se Google ofron motorin më të mirë të kërkimeve, por thotë se ne nuk duhet të lejojmë që një gjë e tillë të jetë e qasshme kaq lehtësisht”, u tha në deklaratën e kompanisë Google.
Prokurori i Përgjithshëm i SHBA-së, Merrick Garland, e quajti vendimin “fitore historike për popullin amerikan” dhe shtoi se “asnjë kompani, pavarësisht sa e madhe dhe sa ndikim ka, nuk është mbi ligjin”.
Mehta tha se Google kishte paguar 26.3 miliardë dollarë vetëm më 2021 për t’u siguruar që motori i kërkimeve të kompanisë të ishte kryesori për telefonat e mençur dhe për të mbajtur dominimin në treg.
Në katër vjetët e fundit, rregullatorët federalë kanë paditur po ashtu platformat Meta, Amazon.com dhe Apple duke pretenduar se kompanitë në mënyrë të paligjshme monopol. Të gjitha këto raste kishin nisur në kohën kur president ishte republikani Donald Trump.
Rasti ndaj Google u ngrit më 2020 dhe ishte hera e parë që Qeveria amerikane akuzonte një korporatë të madhe për monopol të paligjshëm.
Më 2004, Microsoft kishte arritur një marrëveshje me Departamentin amerikan të Drejtësisë lidhur me akuzën se kompania detyronte përdoruesit e Windows-it që të përdornin Internet Explorer si makinë kërkuese në kompjuterët e tyre./ REL
