Hapja e Urës së Ibrit, reagon Lista Serbe: Qëllimi është destabilizimi i situatës!

Foto ilustruese

KOSOVË- Zëvendësdrejtori i Policisë në Veri, Veton Elshani ka paralajmëruar hapjen e urës së Ibrit që ndan pjesën veriore dhe jugore të Mitrovicës. Në lidhje me këtë deklaratë ka reaguar sot "Lista Serbe" duke thënë se kjo është lëvizje e panevojshme dhe e papranueshme. Më tej në reagim thuhet se hapja e urës ka qëllim destabilizimin e situatës.

“Kujtojmë se situata aktuale është pjesë e marrëveshjes së arritur në Bruksel ndërmjet Beogradit dhe Prishtinës. Njëkohësisht theksojmë se trafiku aktualisht po rrjedh normalisht nga pjesa jugore në veri të qytetit në katër drejtime, mbi tre ura dhe një rrugë lokale, dhe nuk ka nevojë për urën”, thuhet në reagim nga Lista Serbe.

Ata i bënë thirrje KFOR-it, EULEX-it dhe përfaqësueve të Brukselit që të reagojnë dhe të parandalojnë që të ndodhë një krizë tjetër.

“I bëjmë thirrje Kfor-it, EULEX-it, por edhe përfaqësuesve të Brukselit që të parandalojnë Kurtin të shkaktojë një krizë tjetër dhe ta pengojnë planin e tij për dëbimin e serbëve nga Kosova. Ju bëjmë thirrje që të reagoni urgjentisht dhe t’i tregoni regjimit në Prishtinë se hapja e urës nuk mund të bëhet pa pëlqimin e serbëve që jetojnë në veri të Kosovës, veçanërisht në Mitrovicën e Kosovës, për këtë arsye, nga disa mijëra serb, vetëm një prift jeton në Mitrovicën jugore me familjen e tij nën vëzhgim të vazhdueshëm policor”, kanë thënë nga Lista Serbe.

lista serbe ura e ibrit