Irani i ka kërkuar ndihmë Washingtonit pas rrëzimit të helikopterit presidencial

IRAN- Irani i ka kërkuar ndihmë Washingtonit pas rrëzimit të helikopterit që vrau presidentin Ebrahim Raisi, raportoi një zëdhënës i administratës amerikane, pa dhënë detaje.

"Nuk do të hyj në detaje, por qeveria iraniane na ka kërkuar t'i ndihmojmë," tha gazetarëve zëdhënësi i Departamentit të Shtetit, Matthew Miller. 

Por ai vuri në dukje se SHBA nuk ishte në gjendje ta ofronte atë ndihmë, kryesisht për arsye logjistike. Pothuajse në të njëjtën kohë, duke informuar gazetarët në Shtëpinë e Bardhë, zëdhënësi i Këshillit të Sigurisë Kombëtare John Kirby tha se Raisi kishte gjak në duart e tij për mbështetjen e organizatave ekstremiste në rajon dhe që ishte përgjegjës për abuzimet e rënda të të drejtave të njeriut në Iran. 

Gjithashtu SHBA do të vazhdojë ta mbajë Iranin përgjegjës për veprimet destabilizuese, siç e quajti Kirby, në rajonin e Lindjes së Mesme. Megjithatë, më herët, Washingtoni i kishte shprehur zyrtarisht ngushëllimet Iranit për vdekjen e Raisi.

Përplasja e helikopterit ditën e djeshme ndodhi teksa Raisi dhe ministri i Jashtëm, Hossein Amir-Abdollahian po ktheheshin nga një ceremoni për hapjen e një dige në kufirin e Iranit me Azerbajxhanin, njoftoi media shtetërore.

Pamjet me dron të rrënojave të helikopterit të marra nga Gjysmëhëna e Kuqe dhe të transmetuara në median shtetërore Agjencia e Lajmeve FARS treguan vendin e rrëzimit në një kodër të pjerrët, të pyllëzuar, me disa pjesë të mbetura nga helikopteri.

Pas përplasjes një operacion kërkim-shpëtimi me orë të tëra u organizua me ndihmën e Bashkimit Evropian dhe Turqisë, por ekuipazhet e emergjencës u penguan nga mjegulla dhe rënia e temperaturave.

Incidenti vjen në një kohë të ndjeshme brenda vendit për Teheranin dhe shtatë muaj pas luftës së Izraelit kundër Hamasit në Gaza që ka rritur tensionet në të gjithë Lindjen e Mesme dhe ka nxjerrë në shesh një luftë të gjatë në hije midis Izraelit dhe Iranit. Muajin e kaluar Irani nisi një  sulm të paprecedentë me dron dhe raketë  ndaj Izraelit, sulmi i tij i parë i drejtpërdrejtë në këtë vend, në përgjigje të një sulmi të dukshëm ajror izraelit në  konsullatën e Iranit në Damask.

ebrahim raisi