Izraeli publikon rezultatet e para të hetimit për 7 tetorin

Foto ilustruese

IZRAEL- Ushtria izraelite publikoi rezultatet e hetimit të saj të parë për serinë e sulmeve nga Hamasi më 7 tetor. Në orët e hershme të mëngjesit të 7 tetorit, sulmuesit e udhëhequr nga Hamasi thyen gardhin e sigurisë së teknologjisë së lartë, që ndan Rripin e Gazës nga Izraeli. Në një sulm të befasishëm, militantët pushtuan disa zona izraelite dhe baza ushtarake. Disa hynë në Kibbutz Be'eri, që ndodhet pak kilometra larg kufirit. Atje vranë më shumë se 100 nga 1.100 banorët dhe rrëmbyen 32 persona. Rrëmbimi i civilëve është bërë një simbol i tmerrshëm i sulmit të Hamasit.

Të enjten e kaluar, të mbijetuarit e sulmit u informuan për rezultatet e hetimit të parë të brendshëm nga Forcat Mbrojtëse të Izraelit (IDF) se si ndodhën sulmet në Kibbutz Be'eri. Shumica e banorëve të atjeshëm u zhvendosën në një vendpushim në Detin e Vdekurpas sulmit dhe nuk janë kthyer më në shtëpitë e tyre deri më tani. Reagimet ndaj raportit ishin të ndryshme, ka pasur edhe shumë banorë të zemëruar për dështimin e ushtrisë së tyre. Megjithatë, ata pranuan se ajo tani po merr përgjegjësinë.

"Kibbutz Be'eri nuk kishte nevojë për rezultatet e hetimit për të mësuar për dështimin dhe kohën e IDF, të cilën ata e ndjenin në lëkurën e tyre çdo minutë fatale të atij Shabati të zi, duke filluar nga 6 e 29 minuta," thonë banorët, në një deklaratë me shkrim. "Dështimi i ushtrisë është gdhendur në trupat dhe zemrat tona për nëntë muaj."

Rikthimi i besimit në ushtri

Ky është hetimi i parë i detajuar nga ushtria për serinë e sulmevetë 7 tetorit. Kjo mund të shihet si një përpjekje e ushtrisë izraelite për të rikthyer besimin mes popullatës. Rreth 1200 njerëz u vranë atë ditë dhe 251 persona u morën peng.

"Forcat izraelite nuk arritën të mbronin banorët," tha Daniel Hagari, një zëdhënës i IDF, duke shtuar: "Është e dhimbshme dhe e vështirë të thuhet se IDF duhet të kishte mbrojtur njerëzit e Kibbutz Be'eri, por për fat të keq, nuk i mbrojti. Gjatë orëve të gjata të luftimeve, banorët e Be'erit mbrojtën familjet e tyre me trupat e tyre, duke u përballur vetëm me terroristët.

Deri në mesditë, sipas raportit të IDF, rreth 340 sulmues ishin në kamp, ​​mes tyre të paktën 100 anëtarë të njësisë elitare të Hamasit, Nukhba. Për pjesën më të madhe të ditës, ata lëviznin lirshëm nga shtëpia në shtëpi, duke dhunuar civilët, duke i vrarë dhe rrëmbyer.

Gazeta izraelite Haaretz raportoi se hetuesit morën mesazhe përmes WhatsApp nga banorët e Kibbutz Be'eri, disa prej të cilave përfundonin me fjalët: "Ku dreqin është IDF?" Disa nga ata njerëz nuk jetojnë më. Në raport flitet për kaosin që mbizotëroi për orë të tëra. Ai tha se IDF "nuk ishte i përgatitur për skenarin e infiltrimit në shkallë të gjerë të forcave armike, i cili ndodhi më 7 tetor".

Një tank i ushtrisë izraelite hapi zjarr ndaj pengjeve

Midis orës 9:00 dhe 13:30, Hamasi kishte nën kontroll zonën, sipas raportit të IDF. Gjatë kësaj periudhe, "ushtarët e parë të IDF-së mbërrijnë atje, u përgjigjen me zjarr, evakuuan të plagosurit dhe u larguan, duke u pozicionuar në hyrje të këtij vendi”. Gjatë kësaj periudhe, 32 pengje nga Kibbutz Be'eri u dërguan në Gaza, përfundon raporti. Vetëm pas orës 13:30 u vu re një "prezencë e konsiderueshme e forcave izraelite të sigurisë”. "Kontrolli operacional” mbi këtë zonë u arrit vetëm gjatë natës mes 7 dhe 8 tetorit, kur më në fund banorët e mbijetuar u shpëtuan dhe u evakuuan”, thuhet në raport.

Hetimi i IDF-së detajon gjithashtu një nga incidentet më të diskutueshme më 7 tetor, kur ushtria urdhëroi një ekuipazh tankesh të hapte zjarr mbi një shtëpi ku 15 persona mbaheshin nga militantët e Hamasit. Më vonë, në këtë shtëpi u gjetën 14 pengje të vdekur.

Në total, 101 banorë dhe 31 oficerë të Shërbimit të Sigurimit u vranë në Kibbutz Be'eri, duke përfshirë anëtarë të ekipit lokal të reagimit të shpejtë, ushtarë dhe policë. Përveç kësaj, 32 persona, të cilët ikën në këtë zonë nga një festival muzikor aty pranë, u rrëmbyen dhe u dërguan në Gaza. Njëmbëdhjetë prej tyre janë ende peng.

Për shumicën e banorëve të evakuuar të Kibbutz Be'eri, madje edhe për publikun e gjerë izraelit, detajet e raportit të IDF nuk erdhën si befasi. Që nga tetori, shumë të mbijetuar kanë vazhduar të flasin se si kanë pritur me orë të tëra për ndihmë.

Hetimi nuk iu përgjigj pyetjeve më kritike. Si për shembull, pse kaq shumë ushtarë u mblodhën në portën e Kibbutzit pa hyrë brenda për orë të tëra, dhe çfarë shkaktoi dështimin e shërbimit të inteligjencës që lejoi Hamasin të depërtonte në Izraelin jugor dhe të vazhdonte të vriste pa një përgjigje adekuate nga forcat izraelite të sigurisë.

Pothuajse 10 muaj pas sulmit të Hamasit, presioni publik po rritet për t'i mbajtur përgjegjës për dështimin e ushtrisë izraelite, edhe pse hakmarrja izraelite në Gaza është duke u zhvilluar. Mbi 38.000 palestinezë janë vrarë në fushatën ushtarake të IDF, sipas Ministrisë së Shëndetësisë të Hamasit në Gaza. Ka thirrje në rritje për të vërtetuar të vërtetën, ndërsa ekspertët thonë se hetimet si ky i fundit nuk jenë të mjaftueshme.

Disa zyrtarë të sigurisë kanë marrë publikisht përgjegjësinë, por vetëm disa kanë dhënë dorëheqjen. Të enjten (11.07), ministri izraelit i mbrojtjes Yoav Gallant bëri thirrje për krijimin e një Komisioni Shtetëror të Hetimit. "Duhet vënë në pikëpyetje të gjithë: vendimmarrësit, profesionistët, qeverinë, ushtrinë dhe shërbimet e sigurisë, sikur edhe vendimet e qeverisë gjatë dekadës së fundit, që çuan në ngjarjet e 7 tetorit", tha Gallant në ceremoninë e diplomimit për oficerët e IDF. Në ceremoni mori pjesë edhe kryeministri izraelit Benjamin Netanjahu, i cili vazhdimisht e ka hedhur poshtë idenë e një komisioni të pavarur hetimor në kohën kur Izraeli është në luftë./ DW

izrael hetime sulmi i 7 tetorit